TJ van der Walt (18), blitsatleet van Hopetown, het Saterdag (10/12) ’n goue medalje in die 400 m-nommer op die Afrika-unie-sportraad (AUSC) se Streek 5-jeugspele in Lilongwe, Malawi, verower.
Dié leerling aan die Hoërskool Hopetown, wat vanjaar in matriek was, was ook in die Suid-Afrikaanse 400 m-aflosspan wat Donderdag ’n silwermedalje op die byeenkoms verwerf het.
TJ het die 400 m in 47.28 voltooi, en hoewel dit nie sy persoonlike beste tyd is nie, word dit as “heel aanvaarbaar” beskou in die reëntoestande wat geheers het.
Sy naam pryk sedert vroeër vanjaar op die atletiekwêreldranglys ná sy deelname aan die o.20-wêreldkampioenskapsbyeenkoms in Colombia.
In Saterdag se 400 m-eindronde het TJ teen onder andere drie atlete van Botswana meegeding wat almal hoër as hy op dié ranglys is.
Meer as 3 000 atlete van tien lande in Suider-Afrika het aan die byeenkoms, van 2 tot 12 Desember, deelgeneem. Die Suid-Afrikaanse span van 209 atlete is as die algehele wenner aangewys.
