Talentvolle jong skaakgeesdriftiges van die Hoërskool Loeriesfontein het onlangs aan ’n skaaktoernooi in Williston deelgeneem en twee medaljes huis toe gebring.
Die span, bestaande uit ses leerlinge, het hul skool met groot vasberadenheid as deel van die Rise and Excel-program verteenwoordig.
Dewido Beukes het ’n silwermedalje verower en Eathon Strauss brons.
Christopher Okhuis, Deogan Swarts, Shonrey-Lee Basson en Fabian Muller het ook deelgeneem.
“Ek is opgewonde en trots op ons span se prestasie. Om te sien hoe hulle groei en kritiese denkvaardighede, strategiese beplanning en sportmanskap ontwikkel, was ’n ongelooflike reis. Die prestasie is ’n bewys van individuele talente, en ’n weerspieëling van die ondersteunende en samewerkende gees van ons skoolgemeenskap,” sê Zitrom Steenkamp, afrigter.
Met vervoer wat deur Loeriesfontein en Khobab-windkragaanlegte befonds is, het die span na Williston gereis waar hulle tydens ’n formele kompetisie jong spelers van oor die streek die stryd aangesê het.
“Skaak is meer as net ’n sport vir hierdie leerlinge, dit is ’n poort tot kognitiewe ontwikkeling, verbeterde akademiese prestasie en die slyp van kritieke lewensvaardighede.
“Deur die dissipline van skaak bou hulle selfvertroue op, versterk hul fokus en ontwikkel strategiese denkvermoëns wat hulle tot ver verby die skaakbord sal bevoordeel,” sê Vanessa Fredericks, ekonomiese-ontwikkelingsbestuurder vir die windkragaanlegte.
