Om in die groeiende vraag na sportafrigting van gehalte in Loeriesfontein te voorsien, is ’n omvattende opleidingsprogram onlangs in dié dorp bekendgestel wat plaaslike rugby-, sokker- en netbalspanne betrek.
Dit dra tot die ontwikkeling van sport in die Namakwa-distrik by, met planne om formele ligas te stig wat reeds in die vooruitsig is.
“In 2023 het die sportgemeenskap die behoefte aan verbeterde afrigtingsondersteuning uitgespreek, wat ’n belangrike rol in sportopvoeding en sosiale ontwikkeling speel,” sê Vanessa Fredericks, ekonomiese ontwikkelingsbestuurder vir die Loeriesfontein- en Khobab-windkragaanleg, wat die programfinansierders is.
“Sport kweek lewenswaardes soos respek, spanwerk, deursettingsvermoë en persoonlike toewyding.
“Ons is trots om hierdie program te ondersteun, wat plaaslike afrigters toerus met die gereedskap om die volgende geslag atlete te bemoedig en te ontwikkel.”
Die program, deur Top in Sport in werking gestel, sluit modules soos afrigter- en atleetontwikkeling, sportsielkunde, beseringsvoorkoming en -bestuur, doeltreffende kommunikasie en sportklubontwikkeling in.
Deelnemende afrigters ontvang ook noodhulpopleiding.
Afrigters sal noodsaaklike sportmateriaal vir hul spanne, asook handelsmerkklere ontvang.
