Die Suid-Afrikaanse fietsrygemeenskap treur oor die verlies van een van sy mees geliefde figure, JP van Zyl (52), die stigter van Recycles Bike Shop in Bellville. JP en sy goeie vriend, Meurant Botha, wat ook in plaaslike fietsrykringe bekend is, is verlede Saterdag (13 September) tragies in ’n motorongeluk naby Calvinia oorlede.
JP, wat vir sy vriendelike glimlag en goeie kennis van fietse bekend was, was veel meer as net ’n werktuigkundige. Vir duisende fietsryers was hy ook ’n vriend, mentor en reddingsboei – die een wat hulle weer op die roete of die pad kon kry wanneer alles verlore gelyk het.
Van passie tot beroep
JP was sedert 1989 ’n toegewyde bergfietsryer en het 13 jaar in die fietsbedryf gewerk voordat hy Recycles in 2002 gestig het. Sy visie was eenvoudig maar kragtig – om ’n winkel en dienssentrum te skep waar fietsryers van alle vlakke welkom voel en waar fietse met dieselfde respek en sorg as hul eienaars behandel word .
Recycles het spoedig ’n hoeksteen van die Wes-Kaapse fietsrygemeenskap geword, maar JP se invloed het egter ver buite die winkelvloer gestrek. Hy was veral bekend vir sy tegniese ondersteuning tydens Suid-Afrika se mees uitdagende bergfietswedrenne. Hy en sy span het sedert 2006 by fietsrytoere soos die Cape Epic, Sani2C, JoBerg2C, Wines2Whales, Tankwa Trek en Cape Pioneer Trek dienste gelewer.
Fietsryers kon altyd op JP reken. Hy het selfs tot laat in die nag of die vroeë oggendure fietse met akkuraatheid en sorg herstel.
Soos een deelnemer onthou: “Dit het nie saak gemaak of jy ’n topwedryer of ’n beginner was wat jou eerste wedren senuweeagtig aanpak nie – JP het sy tyd en kennis mildelik gedeel.”
’n Vriend vir almal
JP was ’n bekende gesig op plaaslike fietsryroetes en het gereeld saam met die Tygerberg MTB-klub gery.
In ’n sport wat dikwels deur sterk mededinging gekenmerk word, het JP vir sy nederigheid uitgestaan. Hy het nooit van ander sleg gepraat nie en stilweg die bewondering van fietsryers, mede-werktuigkundiges en organiseerders verwerf.
’n Nalatenskap
JP en Meurant se vriendskap het langer as drie dekades gestrek en elkeen het op sy manier tot die groei van bergfietsry in Suid-Afrika bygedra. Saam het hulle die Wes-Kaap as die Suid-Afrikaanse hart van plaaslike bergfietsry gevestig.
JP se passie het verder as fietse gestrek – hy was ook ’n liefhebber van klassieke motors; veral Amerikaanse V8’s. Hy en Meurant was saam aktief in Kaapstad se “muscle car”-gemeenskap.
Die motorskrywer Lance Branquinho het dit só opgesom: “As dit wiele gehad het, wou hulle daaraan werk – van Mustangs tot seldsame Mopars; sy motors was nooit net versamelstukke nie. Hulle is herstel om te ry, aan byeenkomste deel te neem en saam met ander geniet te word.
“JP se projekmotors is gebou om te ry,” het Branquinho gesê.
“Hy was altyd die gelukkigste wanneer ander dit ook kon ervaar – tipies van ware versamelaars.”
Vir JP was die liefde vir masjienerie – hetsy fietse of motors – nooit bloot meganies nie. Dit het gegaan oor die vreugde wat dit gebring het en die gemeenskappe wat daarom gebou is.
’n Blywende invloed
JP laat sy familie, vriende, kollegas en die ontelbare fietsryers wat hy geraak het, agter.
Sy afwesigheid laat ’n groot leemte, maar sy invloed sal voortleef in elke ren waar Recycles ’n rol gespeel het, elke roete wat hy ander gehelp het om te oorwin en elke motor of fiets wat hy met sorg herstel het.
