‘n Dertienjarige seun van Franschhoek is Maandagmiddag (26 Oktober) ernstig beseer nadat hy deur ‘n fiets omgery is. Die tiener het ‘n diep snywond aan die voorkant van sy kop opgedoen.
Volgens Raylene Plaatjies (51), ‘n familievriend, het die ambulans eers sowat drie uur ná die voorval opgedaag.
Plaatjies, wie se kleinkind ‘n vriend van die seun is, sê die seun en sy vriende het omstreeks 15:50 op hul fietse by haar huis verbygery.
LEES OOK: Much-loved golf caddy struck by traffic cop on R44
Nooddienste ontbied
Omstreeks 16:00 het sy haar dogter hoor skree en na buite gehardloop. “Toe ek uitkom, het hy reguit in my arms in gehardloop. Toe sien ek die snywond aan sy kop,” vertel Plaatjies erg ontsteld.
Sy sê hulle het hom dadelik in die huis geneem en ‘n lap teen die wond gedruk om die bloeding te probeer stop. Die seun het ook oor pyn in sy linkerarm gekla.
Plaatjies sê die seun het volgens haar dogter “om die draai” in La Province-straat, Franschhoek gestaan toe ‘n fietsryer na bewering die draai te na aan die sypaadjie gevat en teen hom vasgery het.
Volgens Plaatjies is die volwasse man wat die fiets gery het een van die seun se ander vriende se broer.
Plaatjies sê sy het ‘n sekuriteitsbeampte wat verbygery het, gevra om ‘n ambulans te ontbied. Sy het ook self die nooddienste gebel.
Saak nog nie gemaak
“Ons het lank gewag vir die ambulans en ek het toe weer gebel, maar steeds het hulle nie opgedaag nie,” vertel sy.
Later is die Franschhoek First Responders ontbied. Twee lede van die span het omstreeks 18:30 by Plaatjies se huis opgedaag om die seun te help.
Die ambulans het kort voor 19:00 opgedaag en die seun is volgens Plaatjies omstreeks 19:05 na die hospitaal geneem.
“Die seun en sy ma het om 02:51 by hul huis aangekom,” sê sy.
Volgens Plaatjies het die seun se ma haar later ingelig dat hulle Dinsdagoggend (27 Oktober) moes terugkeer na die kliniek vir verdere mediese hulp.
Sy sê die seun se ma het nog nie kans gekry om ‘n amptelike klag by die polisie aanhangig te maak nie.
LEES OOK: Helshoogte-botsing: Ma sterf in hospitaal dae ná sesjarige seun
