Die 2026 Endler-konsertreeks keer die naweek terug vir sy tweede seisoen, van Julie tot Desember, met ‘n indrukwekkende program van kamermusiek, koorkonserte, orkesuitvoerings, jazz, musiek-kompetisies en besoekende kunstenaars in die Endler- en Fismer-saal van die Universiteit Stellenbosch (US) Konservatorium.

Die seisoen open op Vrydag 24 Julie om 19:00 met Journey of the Soul, ‘n Endler Prestige-konsert met Féroll-Jon Davids (klarinet), Rosamund Roth (tjello) en Nina Schumann (klavier).

Die konsert is gebou rondom musikale storievertelling, versterk deur die geheimsinnige elemente van fantasie.

LEES OOK: Tweede Endler-konsertreeks vanaf Augustus tot Oktober bied musikale uitnemendheid

Betowerende musiek

Journey of the Soul nooi die gehoor uit om diep in hul verbeelding te delf, terwyl die ensemble ‘n verskeidenheid gemoedstemmings, natuurtonele, karakters en ‘n spektrum van emosies oordra, wat Schumann, Muczynski en Brahms kundig geskep het.

Op Vrydag 31 Julie is dit die beurt van die US-kamerkoor in Voices Without Borders.

Die program, onder leiding van Lunathi Ncamani en Martin Berger, vier die vermoë van koormusiek om kulture, tale en generasies te verbind, en beweeg van die ryk oevre van Suid-Afrikaanse koormusiek tot inspirerende werke uit die internasionale repertorium.

Koorkuns

Augustus bring verdere hoogtepunte, insluitend Piano², die jaarlikse klavieruitruil van die US en Universiteit Kaapstad, op Woensdag 12 Augustus.

Op Vrydag 14 Augustus keer die US-koor, onder leiding van André van der Merwe, terug na die Endler-verhoog met ‘n program van uitsonderlike koorkuns.

Die Prestige-reeks gaan voort met The Chopin Project II: Complete Chamber Music, met die pianis José Dias se verkenning van die werke van Frédéric Chopin op Vrydag 21 Augustus.

Dias sal deur die bekende Suzanne Martens (viool) en Peter Martens (tjello) vergesel word.

Besoek Webtickets vroegtydig vir kaartjies.

LEES OOK: Endler-konsertreeks se tweede seisoen begin Vrydag