‘n Jongman van Strand se ambisie om sy ouers trots te maak, het hom na die Mail & Guardian se lys van Top-200- jong Suid-Afrikaners gedryf.
Die nasionale koerant het die 34-jarige Zaid Railoun, ‘n inwoner van Rusthof, Vrydag 8 Augustus in die energie-afdeling vir sy werk aan die “kruising” van finansies en bewaring erken.
“Ek voel baie gevlei om as een van die Top-200- jong mense aangewys te word,” sê Railoun. “Met die regte ondersteuning is enigiets moontlik.”
Sy ondersteuningstelsel is sy ouers Ebrahim “Boetie” en Gisell “Zelly” Railoun, wat van jongs af sy passie toegelaat het om te ontwikkel. Tydens sy grootwordjare in die Helderberg het hy sy liefde vir die natuur ontwikkel.
Terwyl sy pa as onderwyser by Danie Ackermann Primêr gewerk het, was dit sy ma se entrepreneurskap wat hom aan bewaring voorgestel het. “Sy het indringerbome op Lourensford-plaas verwyder en die hout verkoop.”
Met dié fondasie het hy sy honneursgraad in Omgewings- en Water-wetenskappe in 2014 aan die Universiteit van Wes-Kaapland voltooi. Ná tyd in die olie- en gassektor het ‘n onderhoudvoerder sy navorsingsbelangstelling raakgesien en ‘n meestersgraad by Stellenbosch voorgestel.
Ná sy meesters het Railoun sy tone by ‘n beleggingsfirma, wat in Afrika se infrastruktuurprojekte belê, in finansies gedompel. Hy het ook vir plaaslike koerante oor infrastruktuur begin skryf. “Ek het nie ‘n loopbaanontwikkelingsplan gehad nie, maar geniet drie dinge – lees, skryf en netwerk.”
As spesialis by Standard Bank het hy in 2023 die Mark of Excellence-prys vir PowerPulse, ‘n digitale platform wat sakeondernemings met sonkragverskaffers verbind, ontvang.
Railoun glo dat sport die taal is waarin sy gemeenskap teruggee verstaan. Te same met Abdullah Gabier het hy Sporting Hands, wat geld vir sosiaal-ekonomiese oorsake insamel, gestig.
“My ouers was nog altyd daar vir mense – sonder enige koste – en dit is die beginsel wat ek my eie gemaak het,” sê hy.
Vir hom is sukses nie net erkenning nie, maar hoe jy ander se lewe raak – ‘n les wat begin het met wortels wat verwyder is en nou groei as beleggings.
You must be logged in to post a comment.