Die Strand-rugbyklub het die mooiste drie nog gedruk toe die klub die afgelope naweek nege dekades van rugbysukses gevier het.
Die bekende rugbyklub het Saterdag (5 Julie) sy 90ste bestaansjaar met ‘n spoggeleentheid in die Strand-stadsaal gevier.
Deel van die vieringe was voormalige en huidige spelers sowel as administrateurs en ondersteuners wat almal in samesyn en hul Sondag-beste bymekaargekom het.
Die geleentheid is gevul met geskiedenis en erfenis – nie net om ‘n sportklub te vier nie, maar ‘n plaaslike instelling wat in 1935 gebore is.
DIE STIGTING
Die klub is gestig ná ‘n wegbreek van verskillende plaaslike rugbyklubs deur twee broers, bekend as die Khan-broers, wat ‘n visie vir gemeenskapseenheid gehad het. Oor nege dekades het dit van ‘n amateur- in ‘n gedeeltelik professionele klub ontwikkel.
RYK GESKIEDENIS
Die klub is in die geskiedenis van Suid-Afrikaanse rugby verweef. Een van sy grootste prestasies is dat twee van sy spelers, Hennie en Turkey Shields, lid was van die Proteas-rugbyspan – die eerste span vir bruin spelers wat ‘n internasionale toer onderneem het toe hulle in 1971 na Engeland gereis het om wedstryde teen vier plaaslike spanne te speel.
Die Proteas was die Suid-Afrikaanse nasionale rugbyspan vir bruin spelers tydens die Apartheid-era.
Die Shields-broers was ook deel van die Proteas wat in 1976 teen die All Blacks gespeel het.
Een van die spelers wat voor die eenwording van alle nasionale rugbyspanne in 1992 deur die Protea-geledere gekom het en die finale o.21-kaptein was, is
Rodger Daniels, wat tans die voorsitter van die Strand-rugbyklub is.
“Ek is al 46 jaar lid van die Strand- rugbyklub en buiten myself en die Shields-broers het ander spelers die blou van Strand gedra en vir die Proteas gespeel.
“Dit sluit in spelers soos Peter, Hennie en Turkey Shields se ander broer, asook Jaap Bekkers, wat die eerste Protea-kaptein was,” sê Daniels.
Hy sê deur die jare het spelers soos Naties Jacobs, Naiam Thomas, Naftalie Engelbreght, Quinton Daniels, Ernest Lodewyk, Ramone Samuels, Dillon Leyds en Tristan Leyds die blou van die klub en nasionale truie gedra.
PRESTASIES
Die klub se geskiedenis is gevul met soveel toekennings as wat dit onderskeidende spelers het.
Vir Daniels is die klub se grootste prestasies sy oorwinning van die Rapport-toernooi in Stellenbosch en sy oorwinning oor die Northern Kings, om die gesogte Elsie Kearns-beker te verower.
Daniels is trots op die vriende wat die klub onderweg gemaak het deur wedstryde, soos die vurige spel teen Maties onder die leierskap van Karel du Plessis.
“Natuurlik speel ons plaaslike derbies teen die Helderberg-rugbyklub, ddie St. Georges-rugbyklub, die Macassar-rugbyklub, die All Saints United-rugbyklub en Sir Lowrians, wat die sport in ons gemeenskappe aangedryf en gevoed het,” verduidelik Daniels.
UITDAGINGS
Met dinge wat byna ‘n eeu lank bestaan het, is die klub deur die meule van omstandighede.
“Die grootste uitdagings waardeur ons in die gesig gestaar word, is finansieel,” sê Daniels. “Om ‘n klub te bestuur, kos geld en ons wil seker maak ons het die hulpbronne om baie spelers speelgeleenthede te gee.”
Die klub het tans 120 geregistreerde spelers van o.20 tot by sy A-span. Om te verseker dat die klub genoeg toerusting en goed instandgehoude infrastruktuur
het, is geen maklike taak nie, maar Daniels beskryf die bestuur as ‘n klein maar gedugte span wat die stigtersbroers se visie van eenheid behou het.
FAMILIE-WAARDES
As gevolg van die familie-ingesteldheid het die klub dit op hulself geneem om die gemeenskap te beskerm deur elke lid weg te hou van die euwels wat die gemeenskap teister.
“Ons kyk na ons mense deur godsdienstige waardes huis toe te bring na hulle en hulle die belangrikheid van geloof in hul lewens te leer,” sê Daniels.
Dit is as gevolg hiervan dat die klub tradisioneel elke seisoen met ‘n kerkdiens begin sodat spelers, administrateurs en ondersteuners hul jaarlikse seëninge kan ontvang.
‘n Ander tradisie is dié van liedjies en hierdie jaar het die klub uiteindelik hul volkslied gekry wat deur Pike Productions geskep is en by elke wedstryd gehoor kan word.
“Maar ons grootste tradisie is die trots wat ons het dat ons deel is van die ‘blou bloed’ familie,”
sê Daniels.
Die klub het ook baie familiebande met die gemeenskap.
Verskeie plaaslike families soos die Daniels, Jacobs, die voorgenoemde Shields asook die Abels- en Harris-families het geslagte wat met “blou bloed” vloei.
DIE TOEKOMS
Terwyl Saterdag terugkyk na die afgelope 90 jaar, glo Daniels daar is nog veel meer om van die klub te verwag.
“Strand-rugbyklub se toekoms is blink. Ons het jong spelers wat sterk deurkom asook dié wat nooit die Blou Trein sal verlaat nie, omdat hulle vir Strand bloei,”
sê Daniels.
Hy glo met hardwerkende afrigters wat die klub se trots, eenheid en familiewaardes by die spelers wat deurkom sal inboesem, sal die Strand-rugbyklub ‘n eeu en daarbo kan sien.
You must be logged in to post a comment.