‘n Opname deur kringtelevisie-kameras in Wyk 100 wat op Sondag 20 September deur ‘n gemeenskapsleier vrygestel is, het op sosiale media versprei en vrae laat ontstaan oor hoe die stelsels werk.

Ruth Solomons, woordvoerder vir die Stad Kaapstad se metro-polisiedepartement, het bevestig dat daar tans drie kameras in die wyk geïnstalleer en in werking is teen ‘n totale koste van R1,4 miljoen. Dit is deel van ongeveer nege kameras in die Helderberg wat van die Goodwood-kringtelevisiesentrum af gemonitor word.

Lees ook: Kameras kyk na lykstorting

Sy het egter nie laat blyk presies waar of wanneer dit geïnstalleer is nie.

“Dit is ‘n eenvoudige proses vir die polisie om beeldmateriaal te ontvang, en ons is daartoe verbind om hulle in die stryd teen wetteloosheid by te staan,” sê sy.

Sy het verduidelik dat, indien ‘n misdaad op kamera vasgelê word, die protokol bepaal dat die naaste voertuig kan reageer en die polisie met die reaksie kan bystaan. Sy kon nie statistieke verskaf van misdade wat deur die kameras vasgelê is nie.

Twee dae ná die video se vrystelling het wyksraadslid Sean Stacey die projek verder toegelig.

Hy verduidelik dat die keuse vir die kameras geïnspireer is deur Gordonsbaai se kringtelevisieprojek. Hy wou soortgelyke beskerming hê vir Gustrouw, Broadlandspark, Casablanca en Temperance Town wie se inwoners wat nie self vir so ‘n stelsel kon betaal nie.

“Met die teenwoordigheid van kameras wat voortdurend gemonitor word, moet ‘n dwelmhandelaar twee keer dink en versigtig wees om op ‘n straathoek te staan ​​en dwelms aan hul kinders te verkoop. Dit is ‘n bykomende afskrikmiddel om hul misdadige bestaan ​​net soveel moeiliker te maak,” het Stacey gesê.

Die kameras se liggings is gekies op grond van grondbesit, onbelemmerde siglyn, elektrisiteitstoevoer en sekuriteit. Weens tegniese beperkings moes die hoëmas-model gebruik word sodat daar ‘n direkte siglyn kon wees om beeldmateriaal na die beheerkamer oor te sein.

Stacey het bygevoeg dat wykstoekennings in die Stad se jaarlikse begrotingsiklus ingesluit is en by subraad-begrotingsvergaderings aangebied word. Hy doen jaarliks oproepe vir projekvoorstelle van inwoners en organisasies.

“Ek het met baie inwoners gepraat wat te kenne gee dat hulle baie veiliger voel en dat misdaadvoorvalle na hul mening afgeneem het,” sê Stacey.

Lillian Albertyn, voorsitter van die Strand-GPF, het ‘n breër siening van gemeenskapsveiligheid gedeel.

“Gemeenskapsveiligheid gaan nie net oor kameras en polisiëring nie. Dit gaan oor die voorkoming van misdaad, die ondersteuning van slagoffers, die beskerming van kwesbare mense en die oplos van die maatskaplike probleme wat tot misdaad bydra,” het sy gesê.

Sy sê die forum is nie formeel geraadpleeg oor die installering nie en het geen skriftelike kennisgewing ontvang nie. Die GPF kan nie die kameras se doeltreffendheid assesseer nie, omdat hulle nie betrokke was by die beplanning nie en geen inligting oor operasionele reëlings ontvang het nie.

Indien geraadpleeg, sou die GPF geld oorweeg het vir ander gemeenskapsveiligheidsprojekte.

“Kringtelevisie kan deel vorm van ‘n gemeenskapsveiligheidstrategie, maar dit moet vergesel word van behoorlik ondersteunde buurtwagte, sigbare polisiëring, slagofferondersteuning, dwelmvoorkomingsprogramme en jeugprogramme,” het Albertyn gesê.