Kaapse Forum het gedurende Jeugmaand (Junie) in samewerking met die Afrikaanse Taalraad (ATR), skoolskoene aan behoeftige leerders by die Oklahomastraat Primêre Skool en die Hoërskool Zandvliet in Macassar geskenk.
Die ATR en ‘n plaaslike verteenwoordiger van die Wes-Kaapse Onderwysdepartement (WKOD) het die oorhandiging bygewoon. Die leerders was oorstelp van vreugde en dankbaar by die ontvangs van die skoolskoene.
Die skoolhoofde het namens die leerders en hul ouers hul opregte waardering vir die skenking uitgespreek. Hulle het beklemtoon dat skoolskoene ‘n noodsaaklike behoefte is, veral gedurende die koue wintermaande, en dat die ondersteuning ‘n tasbare verskil in die leerders se daaglikse lewe maak.
“Die skoolskoene word vervaardig uit herwonne PVC- mediese materiaal, soos drupsakkies en suurstofmaskers, wat skoongemaak, verwerk en in duursame skoolskoene vir behoeftige leerders omgeskep word. ‘n Mens kry ook die geleentheid om skoene te koop en self te versprei,” sê Elizma Arendse, Kaapse Forum se koördineerder vir administrasie en gemeenskapsprojekte.
“Ons glo elke kind behoort die geleentheid te hê om skool met waardigheid en selfvertroue by te woon. Hierdie inisiatief is deel van die organisasie se voortdurende verbintenis tot gemeenskapsontwikkeling en die ondersteuning van jongmense,” sê Bernard Pieters, Kaapse Forum se hoof van gemeenskapsaktivering.
‘n Besonderse woord van dank gaan aan die adviseurs vir die Afrikaanse kurrikulum van die WKOD se Metropool-Oos-onderwysdistrik vir hul waardevolle ondersteuning met die reëlings van die oorhandiging en hul teenwoordigheid by die geleentheid.
“Deur praktiese hulp en samewerking tussen gemeenskapsorganisasies en die staat, bring Kaapse Forum nie net warmte teen die winterkoue nie, maar ook hoop en ondersteuning aan die jeug van ons gemeenskappe. Hierdie bydrae het ten doel om enige afname in leerderbywoning tydens die nat wintermaande te voorkom,” sluit Arendse af.
