‘n Diepbekommerde Macassar-familie rig ‘n dringende pleidooi aan die breër gemeenskap vir enige leidrade wat kan help om hul vermiste geliefde op te spoor.
Dureen Tasneem Mondge het glo spoorloos verdwyn nadat sy kort voor die Paasnaweek die huis verlaat en kontak met haar familie verbreek het.
“Ons soek haar net veilig terug by die huis,” het haar suster, Juanita Mondge, gesê.
Volgens die 35-jarige beleef haar hele familie – haar bejaarde ouers by wie Dureen gewoon het, sowel as haar vyf sibbe en Dureen se 13-jarige seun – ‘n nimmereindigende nagmerrie sedert haar verdwyning.
“Ons slaap nie en is emosioneel tot die uiterste gedryf,” het sy bygevoeg.
Juanita het voorts gesê haar 67-jarige pa het hom tot die plaaslike polisiekantoor gewend nadat sy nie teruggekeer het nie.
Die Pink Ladies se vermiste-persoon-kenniswingspamflet het ‘n beroep op lede van die publiek gedoen om Dureen, wat omstreeks om 20:00 op 24 April laas gesien is toe sy haar woning in Macassar Village in die geselskap van ‘n onbekende bestuurder van ‘n silwer Volkswagen Polo verlaat het.
Volgens die kennisgewing het die 30-jarige vertrek en gesê sy is op pad na Brackenfell. “Sy is sedertdien nie weer gesien of van gehoor nie,” lui die kennisgewing.
Mense word aangespoor om na vore te kom indien hulle Dureen, wat lank en skraal is met bruin oë en kort swart hare het, gewaar het. Sy was laas in lang swart kouse en ‘n kakie-T-hemp geklee.
Volgens Juanita hoop hul gesin vir haar suster, wat ‘n sin vir humor het en uit medemenslikheid met enigiemand geselsies aanknoop, se veilige terugkoms.
Mense met inligting wat tot ‘n deurbraak kan lei, word aangespoor om die Macassar-polisie by 021 857 7125 te skakel.
