Die Excelsior-vrouesokkerakademie het in hul eerste ses maande in hul eerste jaarlikse “Soccer and Community Spirit Shine”, wat op Sondag 28 September op die Gustrouw-sportterrein gehou is, bewys vrouesokker in Strand floreer.

Dié wedstryde het die akademie se groei uitgelig toe hul o.12- en o.16-spanne teen Kenpark United van Mitchell’s Plain gespeel het, en die senior span teen Helderberg Rovers. Excelsior se spanne het wel die dag se wedstryde verloor – die o.12’s met 0-1 en die o.16’s en seniors met 0-2 – maar die werklike oorwinning was die ongelooflike gees van samehorigheid wat die veld gevul het.

Die geleentheid het vriende, families en sokkerliefhebbers byeengebring vir ‘n dag van passie en trots. Die hoogtepunte was die vertoning van plaaslike spelers, toegewyde afrigters en hartlike ondersteuning.

Die gebeurtenis het Excelsior se seisoen afgesluit, waar hul seniors sewende uit agt spanne in die streekliga geëindig het.

“Hierdie jaar het nie oor uitslae gegaan nie – dit was oor ontwikkeling, en daardie groei is duidelik,” het die afrigter, Megan Meyer, gesê.