Die Macassar-polisie het ‘n geregtelike doodsondersoek geopen nadat ‘n bejaarde egpaar weens ‘n brand gesterf het.
Die voorval het in die vroeë ure van Woensdag 2 September plaasgevind toe ‘n woonstel by die E-woonstelblok in vlamme uitgebreek het.
Volgens ‘n polisiewoordvoerder is nooddienste kort ná 01:00 na die toneel ontbied, waar na bewering ‘n vermeende manlike inwoner van die woonstel weens die vlamme en rook uit die slaap opgespring het.
Die inwoner het na bewering daarin geslaag om ‘n jong kind uit die brandende woonstel te red, maar pogings om die man (68) en vrou (85) te hulp te snel het egter misluk.
Jermaine Carelse, woordvoerder vir die Stad Kaapstad se brandweer- en reddingsdienste, het by navraag gesê ‘n noodoproep oor ‘n woonstel in Bassstraat wat brand, is omstreeks 01:20 ontvang.
“Brandweerspanne van Strand, Macassar en Somerset-Wes is onverwyld ontplooi en het kort daarna op die toneel aangekom. Brandbestryders het die brand teen 02:10 geblus. Die brand het skade aan ‘n woonstel op die grondvloer sowel as ‘n nabygeleë informele struktuur veroorsaak. Tragies het twee bewoners, ‘n volwasse man en ‘n volwasse vrou, weens rookinaseming omgekom. Die toneel is aan die polisie oorhandig om die oorsaak van die brand te ondersoek,” het Carelse gesê.
DistriksPos & Helderberg Gazette het uitgereik na ‘n naasbestaande en die eienaar van die woonstel, wat albei die geleentheid om kommentaar te lewer van die hand gewys het.
Die noodlottige voorval is voorafgegaan deur ‘n brand wat verlede Woensdag (26 Augustus) in New Macassar Village ontstaan het.
Die brandweer het om 01:35 op ‘n oproep gereageer oor ‘n huis wat in Jolene Simonsstraat aan die brand was. Die brandweerspan het om 01:40 op die toneel aangekom en teen 02:20 was die brand geblus.
Die vlamme het een informele struktuur vernietig en gedeeltelike skade aan ‘n formele woning veroorsaak, wat vier mense dakloos gelaat het. Geen beserings is aangemeld nie.
Die oorsaak van die Macassar-brand is ook onbekend.
LEES OOK: “Mother and baby die in one of two Helderberg fires,” 27 Augustus.
You must be logged in to post a comment.