‘n Botsing in Ou Sir Lowry’s Pass-pad in Somerset-Wes het ‘n dringende behoefte beklemtoon om loslopende beeste wat na bewering ‘n toenemende bedreiging vir gemeenskapsveiligheid inhou, te verhinder.
Twee insittendes het die dood net-net vrygespring toe hul voertuig Dinsdag 15 Julie in die vroeë oggendure ‘n bees op die swak beligte roete getref het.
Die middeljarige bestuurder het vertel hy en sy 27-jarige passasier het op die roete van Sir Lowry’s Pass na Somerset-Wes gereis toe die botsing omstreeks 05:45 gebeur het.
“ ’n Motor het op die Ou Sir Lowry’s Pass-pad van voor aangekom. Ek het dus my hoofligte gedompel. Toe die kar verby is, het ek weer my hoofligte aangeskakel en dis toe dat die groot, swart koei voor my kar verskyn het. Alles het so vinnig afgespeel. Ek het my oë toegemaak, die stuurwiel vasgeklou en my gereed gemaak vir die impak,”
het hy herroep.
Die bestuurder het voorts vertel dat toe hy sy oë weer oopgemaak het, hy met dankbaarheid oorweldig is dat hulle die voorval wonderbaarlik oorleef het, ten spyte van geringe beserings en sny- en kneusplekke.
Volgens Kevin Jacobs, ‘n woordvoerder vir die Stad Kaapstad se verkeersdienste, is beamptes om 05:49 na die toneel uitgestuur. Dit was net nadat die brand-en-reddingsdienste reeds om 05:46 op die voorval gereageer het.
“Die regterstrook in die rigting van Sir Lowry’s Pass was versper. Die ryvlak is teen 07:02 opgeruim,”
het Jacobs gesê.
Hoewel die ongelukslagoffer die koerant meegedeel het dat die eienaar van die vermoedelik dragtige koei opgespoor is, het Jacobs dit ontken. Volgens hom is die eienaar nie geïdentifiseer nie.
Hy het inwoners aangespoor om noodgevalle by die Stad se Openbare Noodkommunikasiesentrum aan te meld – skakel 021 480 7700 van ‘n selfoon of 107 van ‘n landlyn af. Hy het verder gesê dat die Stad se dierebeheereenheid op klagtes reageer en diere sal geskut word sodra dit aangemeld word.
Die slagoffer het verder sy misnoeë uitgespreek oor troppe beeste wat dikwels vrylik rondbeweeg oor paaie in en rondom die Sir Lowry’s Pass-gemeenskap en die gevaar wat dit vir motoriste inhou.
Volgens hom meld inwoners gereeld aan dat hulle loslopende beeste teëkom wat deur die gebied loop en potensieel dodelike gevare vir motoriste skep.
Dit is nie net tot die gemeenskap en Ou Sir Lowry’s Pass-pad beperk nie, maar strek ook na die nabygeleë N2-snelweg waar soortgelyke gevaarlike voorvalle dikwels plaasvind.
Die situasie word verder vererger deur die gebrek aan behoorlike beligting op die Ou Sir Lowry’s Pass-pad, tussen die brandweerstasie en die gemeenskap, wat ‘n ernstige veiligheidsgevaar bly – veral vroeg soggens en in die nag.
“Die gemeenskap bring die probleem al jare lank onder die Stad en raadslede se aandag, maar tevergeefs,”
het die slagoffer gesê.
DistrikPos & Helderberg Gazette het by die Stad navraag gedoen oor die huidige status van verbeteringe aan beligting op Ou Sir Lowry’s Pass-pad, maar dié vraag het onbeantwoord gebly.
Luphelo Ngalo, woordvoerder vir die Suid-Afrikaanse Nasionale Padagentskap (Sanral), het verduidelik dat tussen Mei 2024 en April 2025, 16 diereverwante voorvalle langs die N2 gerapporteer is, spesifiek oor Afdelings 2 tot 5. Die meeste voorvalle het in Afdeling 2 plaasgevind, tussen kilometermerkers 18 en 22 (Sinyanyanzela-informele nedersetting tot Orchard-padstal in Grabouw). Hierdie data is gebaseer op voorlopige verslae van die Padvoorval-bestuursstelsel (RIMS).
“Die verantwoordelikheid vir die bestuur van rondlopervee, insluitend wetstoepassing en beslaglegging, berus by plaaslike munisipaliteite en relevante wetstoepassing-owerhede. Sanral het nie wetlike gesag om vee te bestuur of te beslaglê nie. Sanral vervul egter ‘n ondersteunende rol wanneer vee binne die padreserwe gevind word of wanneer voorvalle met vee plaasvind,”
het Ngalo gesê.
Hy het bygevoeg dat Sanral die volgende maatreëls op die nasionale padnetwerk implementeer:
• Omheiningsheinings langs sleutelafdelings van die N2-nasionale pad;
• Waarskuwingsborde in geïdentifiseerde hoërisikogebiede;
• Veeroosters by geselekteerde liggings om toegang te beperk; en
• Data-monitering en analise van voorvalneigings om toekomstige infrastruktuurreaksies te rig.
Volgens Ngalo kan inwoners voorvalle rapporteer deur die volgende kanale:
RIMS-kontaknommers:
• 028 212 9111 (Overberg Gesentraliseerde Kommunikasiesentrum – GKS)
• 021 812 4440 (Metro Vervoerbestuurssentrum)Roetine Padinstandhouding (RPI) kontraknommers:
• 084 277 1343 (Overberg Roetebestuurder)
• 083 501 0028 (Metro Roetebestuurder)Dierekraal:
• 021 534 6426
Ngalo het verduidelik dat voorvalle onder andere aan die GKS of polisie gerapporteer word. RPI en provinsiale Verkeer word ingelig om te help met beheer en om diere van die padweg af te hou. Provinsiale Verkeer sal die dierekraal bel om diere te verwyder.
“Sanral gaan voort om die proaktiewe maatreëls te implementeer: voorvalneigings en -patrone te monitor en ontleed; hoërisikogebiede vir geteikende ingrypings te identifiseer; en RIMS en instandhoudingskontrakteurs vir verbeterde toesighouding en infrastruktuurinstandhouding te koordineer. Waar omstandighede ingryping regverdig, kan Sanral bykomende veiligheidsmaatreëls implementeer soos verbeterde omheining of versterkde padveiligheidsborde in geaffekteerde roedegedeeltes.”
You must be logged in to post a comment.