Nuwe biblioteek kom later

• Die Suiderstrand-biblioteek, wat drie en ‘n half jaar gelede afgebrand het, sal eers in 2026 herbou word, met ‘n konstruksietydperk van 12 maande.
• Die Stad Kaapstad het bevestig dat die bestaande terrein as die optimale ligging vir die nuwe biblioteek gekies is, en die projek is tans in die finale stadiums van die konseptuele ontwerpfase.
• Die gemeenskap, insluitend opvoeders en kinders, treur steeds oor die verlies van die biblioteek, wat ‘n belangrike rol in opvoeding en gemeenskapsbetrokkenheid gespeel het.

Die dorre perseel langs Laer Gordonsbaaiweg in Strand waar slegs onkruid in plaas van ’n nuwe biblioteek uit die fondasie spruit, sal vir langer as ’n jaar nog die hartseer herinnering wees aan die baken van hoop wat voorheen die gemeenskap gedien het.

Die Suiderstrand-biblioteek het drie en ’n half jaar gelede in al sy erfenisryke glorie afgebrand (“Geskiedenis, nie net boeke vernietig,” DistriksPos, 4 Maart 2021).

Die voorval het Sater­dag 27 Februarie 2021 in die vroeë oggendure plaasgevind en was die eerste brand in onlangse jare waarin ’n stadsbiblioteek heeltemal vernietig is. Slegs die buitemure het bly staan.

Die voorval het skokgolwe deur die gemeenskap gestuur, wat nou nog treur oor die vier dekades oue gemeen­skapsbaken wat vir talle jeugdi­ges as veilige hawe gedien het, weergalm het met gemeenskaps­betrokkenheid en opvoedkundige bronne aan die massas beskikbaar gestel het.

Nou – presies twee jaar nadat afbreekwerk aan die biblioteekgebou in Oktober 2022 voortgesit is om plek te maak vir ’n nuwe biblioteek – is bevestig dat die gemeenskap nog langer aan hul reeds dowwe hoop moet klou.

Die Stad Kaapstad het die koerant verlede jaar meegedeel dat die oprigting van ’n nuwe biblioteek in die 2023-’24-boekjaar sou plaasvind, vir moontlike voltooiing in 2025.

Patricia van der Ross, burgemeesterskomiteelid vir gemeenskapsdienste en gesondheid, het by navraag oor die feit dat geen ontwikkeling vanjaar voortgesit is nie, bevestig dat die verwagte tydraamwerk vir die herbou 2026 is. “Die beplande aanvangsdatum is Januarie 2026, met ’n konstruksietydperk van 12 maande,” het Van der Ross gesê.

Volgens Van der Ross is ’n duidelike dryfkrag van die Stad om die biblioteek te vervang. Sy het verduidelik dat die Stad verskeie terreine in Strand ondersoek en geëvalueer het om die beste ligging vir die heropbou van die nuwe biblioteek te bepaal; die gevolg is dat die bestaande terrein as die optimale ligging gekies is.

“Om dienslewering aan die plaaslike gemeenskap te verbeter, is op ’n geïntegreerde fasiliteit ooreengekom, met die biblioteek as die hoofgebruiker. Die projek is tans in die konsepfase van die ontwerp,” het sy gesê.

By verdere navraag oor die projek, wat langer as ’n jaar gelede in die konsepfase was, het Van der Ross verduidelik die Stad het aanvanklik aan ’n ontwerp vir ’n selfstandige biblioteek gewerk, maar toe is versoek dat ’n geïntegreerde fasiliteit oorweeg word (“Wanneer kom die nuwe biblioteek?”, 22 Maart 2023).

Laasgenoemde moes saam met die verskillende departemente werk, en diegene wat belangstelling getoon het, moes bydra tot die bedryfs- en kapitaalbegroting vir die ontwikkeling van die fasiliteit.

Van der Ross het verduidelik die konseptuele ontwerpfase behels grotendeels die ontwerp van die gebou, sy skaal en vorm in die stedelike konteks, sowel as die volume, die afmetings, die ligging op die terrein en hoe dit met die stedelike omgewing verband hou.

In hierdie geval word ’n akkommodasieprogram ook oorweeg, waaroor al die departemente saamstem, waar meubels geplaas word, hoe mense deur die fasiliteit sal beweeg en dit gebruik en waar toegang en uitgange geleë is.

Gedetailleerde oorweging word gegee aan die funksionaliteit van die fasiliteit aangesien dit, sodra dit goedgekeur is, die basis vir die gedetailleerde ingenieursontwerpe word.

“Ons is besig om die konseptuele ontwerpfase af te handel. Dit is in die finale stadiums, ongeveer 40 dae weg van finalisering en goedkeuring.

“Daarna sal die gedetailleerde ontwerpfase begin, gevolg deur die verkryging van ’n kontrakteur. Sodra die kontrakteur aangestel is, sal die konstruksiefase begin,” het sy gesê.

Die hoof van Dr. G.J. Joubert Primêr, Tauhira Fanie, beskou die verlies van die biblioteek as ’n groot probleem. “Die werklikheid is dat ons kinders later nie meer die biblioteek en wat dit vir die gemeenskap beteken het, sal onthou nie. Dit sal heeltemal vergete wees. Vanuit ’n opvoeder se standpunt is die biblioteek noodsaaklik as ons kinders se houding teenoor onderrig en lees positief wil verander,” het Fanie gesê.

“Kinders in die onmiddellike omgewing het na die biblioteek gegaan vir hulp met projekte, studiemateriaal en leesboeke en allerhande leerhulpbronne. Met die biblioteek as gemeenskapsbaken en toevlugsoord was die akademiese resultate baie beter. ’n Liefde vir lees en leer ontbreek aansienlik. Die bewys is daar. Ons kinders word van ’n blink toekoms beroof. Die skool het sy eie biblioteek, maar dit is nie voldoende nie.”

Die twaalfjarige Shadick Thomas het trots gesê hy het sy leesvaardighede by die biblioteek opgeskerp en gesê hy mis die boeke. Hy moet nou op sy ouers staat maak om hom na die Strand-biblioteek te neem.