Oasis – Reach for your Dreams neem die stryd teen omgewingsbesoedeling na Strand se strate. Dié organisasie sonder winsoogmerk se vrywilligers het die afgelope Donderdag (14 Mei) pamflette in Weltevreden as deel van hul omgewingsopruimingsbewustheidsveldtog versprei.

Vrywilligers het met inwoners oor die belangrikheid van omgewingsbeskerming gepraat, aangesien die Soetrivier naby is en al ‘n geruime tyd ‘n potensiële gevaar inhou.

Die pamflet verduidelik waarom ­inwoners van ‘n skoon omgewing bewus moet wees, gee wenke oor behoorlike afvalverwydering en bied raad oor hoe om dit te doen.

Getruida Hendricks, die projekbestuurder van Oasis in Strand, beklemtoon die noodsaaklikheid van die veldtog om die gemeenskap gesond te hou.