Vyftien jaar se wag is verby … Die St. George’s-rugbyklub trek die maroen truie aan om gasheer te speel vir hul Paasnaweektoernooi, en die loting het reeds die vonke laat spat.
“Tussen daardie wit lyne sal geen vriendskaplikheid in die wedstryde wees nie,” sê Reuben Riffel, die organiseerder van die toernooi.
Die geleentheid is besonder betekenisvol vir die plaaslike klub, wat sy 85ste bestaansjaar vier. Dit is die eerste keer sedert 2011 dat die toernooi gehou word – ‘n 15 jaar lange onderbreking, wat die opwinding net verhoog.
“Ons het die laaste keer in 2011 gewen en wil vanjaar dieselfde doen,” sê Riffel met vertroue.
Die loting het by die nuutgestigte Irven October-museum in Rusthof onder sewe deelnemende spanne plaasgevind. Benewens die gasheer sal mede-Helderberg-klubs Strand United, Sir Lowrians en Faure meedoen, tesame met die Wes-Kaapse bure Whistling Wheels van Eersterivier en die Boland-maats Evergreens van Grabouw en Kleinmond. ‘n Agtste klub moet nog aangekondig word.
Die aksie begin op Woensdag 1 April om 19:15 by die Gustrouw-sportterrein wanneer Whistling Wheels teen die onbekende agtste span speel.
Dit word opgevolg deur ‘n opwindende plaaslike derby om 21:00 tussen St. George’s en Sir Lowrians.
Donderdag (2 April) speel Strand United teen Kleinmond (19:15) en Evergreens teen Faure om 21:00. Die halfeindstryd is op Saterdag 4 April en die wenners word die Maandag gekroon.
Die toernooi beloof harde duikslae, asemrowende drieë en ‘n fees van 85 jaar se rugby-erfenis.
You must be logged in to post a comment.