Die Vrystaatse stoeispan het ‘n indrukwekkende medalje-oes teruggebring van die nasionale kampioenskappe.

Daar het 31 stoeiers saam met vyf afrigters van die Vrystaat na Pretoria gereis om aan die Suid-Afrikaanse Stoeifederasie se Greco-Roman Nasionale Kampioenskappe op 30 Mei deel te neem.

Altesaam 591 inskrywings van oor Suid-Afrika heen is vir die kompetisie ontvang, wat die hoë standaard van die kampioenskap beklemtoon het.

Die Vrystaatse stoeiklubs het kompetisie opsy geskuif en as een provinsie saamgestaan. Wed-

ywering is verruil vir kameraadskap en spangees, wat gelei het tot ‘n ware Vrystaat-span waarop almal trots kan wees.

Die Vrystaat-span het die kampioenskappe afgesluit met ‘n indrukwekkende medalje-oes van nege goue medaljes, agt silwer medaljes, 11 brons en drie vierde plekke.

Die kompetisie was uiters uitdagend, met lang ure op die mat en strawwe wedstryde deur die dag. Ondanks sterk teenstand het die Vrystaatse stoeiers deurentyd deursettingsvermoë, karakter en uitstekende sportmangees getoon.

Die sukses van die span is nie net ‘n bewys van die harde werk van die stoeiers nie, maar ook van die toewyding van die afrigters, ouers en die verskillende stoeiklubs wat deur die seisoen saamgewerk het om hierdie jong atlete voor te berei.

Die eenheid tussen die Vrystaatse stoeiklubs het ‘n belangrike rol gespeel in die span se sukses en het gewys dat die provinsie se stoeigemeenskap sterk saamstaan.

Die afrigters en bestuur is besonder trots op elke stoeier wat die Vrystaat-kleure gedra het.