Bloemfonteinse tweekamp-atlete het uitgeblink op die 49ste Suid-Afrikaanse tweekamp-kampioenskapsbyeenkoms wat in Maart in Oudtshoorn aangebied is.
Altesaam 890 atlete van oor die land heen het aan die byeenkoms op 20 en 21 Maart deelgeneem, met sowat 2 500 toeskouers wat hulle ondersteun het.
Die Suid-Vrystaatse juniors was algeheel vyfde uit 14 streekspanne wat deelgeneem het, terwyl ‘n sterk Suid-Vrystaatse senior span algeheel vierde was.
Vyf Suid-Afrikaanse rekords is op die byeenkoms in die 25 groepe opgestel, met die Suid-Vrystaat wat met twee van dié rekords spog.
Jayme Sue Vermaas, wat in die senior vroue-afdeling meeding, het een van dié twee prestasies vermag en daarmee saam goud verwerf.
Die ander rekord is opgestel deur Archie Markgraaff, wat in die afdeling vir mans 80 jaar goud behaal het, met 2 055 punte.
Lynette Fischer, wat in die afdeling vir vroue 60 jaar meeding, het goud verwerf in haar afdeling, met 2 164 punte.
Adri Vermaas het ook goud verwerf, met 2 132 punte.
Francois Deacon het met 2 109 punte ‘n bronsmedalje in sy afdeling, mans 40, verwerf.
You must be logged in to post a comment.