STRAND – Slegs ‘n paar jaar ná haar lewensgevaarlike kankerstryd het ‘n 13-jarige Wes-Kaapse leerder uitstekend by die 45ste Eskom Expo International Science Fair presteer.
Zachary “Zhara” du Toit het verlede week bewys dat volharding vrugte afwerp toe sy ‘n silwermedalje en ‘n kontantprys van R7 000 by die wetenskapskou in Gauteng gewen het. Maar haar pad na sukses was allesbehalwe maklik.
“Net ‘n paar jaar gelede het ek vir my lewe geveg en het my hele graad vyf-skooljaar gemis terwyl ek chemoterapie, bestraling en verskeie operasies ondergaan het,” verduidelik Du Toit.
Om op daardie verhoog te staan, het ek so trots en diep geseënd gevoel, en besef hoe ver ek gekom het. Dit het soveel meer beteken as net ‘n medalje – dit was ‘n simbool van hoop en krag.
Tydens die skou, wat van Maandag 6 tot Vrydag 10 Oktober by die Emperors Palace-konvensiesentrum in Kemptonpark gehou is, het Du Toit met haar “Designing a Reusable Crate for Sustainable Grocery Delivery”-projek ‘n eerste plek in die SAICE-omgewingsingenieurswese behaal.
Sy het tussen meer as 303 leerders van oor die land heen en 16 internasionale deelnemers uitgestaan.
“Ek het geleer dat wetenskap en kreatiwiteit pragtig saamwerk. Ek is lief daarvoor om te ontwerp en innovasie te gebruik om maniere te vind om die wêreld ‘n beter plek te maak,” sê sy.
Du Toit se reis na die internasionale skou het by haar skool die Laerskool Lochnerhof begin toe hulle ‘n wetenskapsprojek volgens die ekspo-formaat bekendgestel het. Haar kreatiwiteit het haar ‘n plek by die Stellenbosch Regional Science Fair, wat in Augustus gehou is,verdien.
Haar passie om mense te help, strek egter verder as net wetenskap. Deur haar projek “Zhara’s Little Lambs” ondersteun sy kinders wat kankerbehandeling ondergaan.
“Die lammers word liefdevol met die hand gemaak deur mense van oor die hele Suid-Afrika. Tot dusver kon ons meer as 5 000 lammers aan kinders in hospitale in die land uitdeel,” verduidelik sy.
Elke lam is ‘n klein simbool van liefde, moed en hoop.
Vir ander jong wetenskaplikes bied Du Toit hierdie raad: “Kies ‘n onderwerp waarvan jy regtig hou – dit maak alles meer pret! Glo in jou idee en moenie opgee nie. En as jy ooit die geleentheid kry om na die internasionale skou te gaan, gryp dit met albei arms aan – dit is ‘n lewensveranderende ervaring!”
You must be logged in to post a comment.