Inge Carolus (27), ’n Worcesterse boorling, is onlangs as Mej. Auckland 2024 gekroon, ’n groot skoonheidskompetisie in Nieu-Seeland.
Sy het saam met haar ouers, dr. Mario en Natalie Carolus, in 2005 na Nieu-Seeland verhuis.
Dit is Inge se eerste kompetisie en dit is ’n groot droom wat vir haar waar word wat baie deure en geleenthede vir haar sal oopmaak. Sy sal Nieu-Seeland later in die jaar by ’n internasionale skoonheidskompetisie verteenwoordig.
Die kroningsaand van Mej. Auckland is op 5 Mei gehou, waar Inge teen 12 ander finaliste meegeding het. Sy is as Beste In Onderhoud, Beste in Aanddrag bekroon en as Charity Queen gekies.
Inge is ’n professionele model en aktrise met ’n passie vir die uitvoerende kunste. In 2019 het sy ’n baccalaureusgraad in gesondheidswetenskap aan die Auckland Universiteit van Tegnologie verwerf. Sy is toegewyd om mense in haar gemeenskap te dien en werk as ’n arbeidsterapeut in die mediese / pediatriese veld. Sy ondersteun kinders met fisieke, neurologiese en geestesgesondheidstoestande binne kwesbare gemeenskappe tydens hul rehabilitasie sodat hulle ná traumatiese gebeure aan betekenisvolle alledaagse aktiwiteite kan deelneem.
Inge is ook ’n gesertifiseerde mentor vir AUT-universiteitstudente en lei opkomende gesondheidspraktisyns op wat die arbeidsterapieveld in Nieu-Seelandse hospitale betree.
Sy het groot talent in ballet, dans op die internasionale verhoog en was gelukkig om beurse te ontvang om by Royal New Zealand Ballet, Australiese ballet en Joffrey Ballet in die VSA opgelei te word.
Deur haar loopbaan as ’n gesondheidspraktisyn het sy haar vaardighede in dans gebruik om dansterapie aan te bied as ’n doeltreffende bewysgebaseerde behandeling en manier vir kinders om van beduidende geestesgesondheidskwessies in plaaslike hospitale te herstel.
Inge het ’n eretoekenning vir ballet ontvang en later haar toneelspelloopbaan in Nieu-Seeland voortgesit in die gewilde sepie-TV-drama Shortland Street, die televisiereeks Ahikaroa op Maori-televisie en die internasionale Jonah Lomu-fliekreeks.
Inge wou nog altyd ’n rolmodel wees vir jong meisies, veral meisies van kleur, om hulle aan te spoor dat dit nie saak maak waar jy vandaan kom of watter teëspoed jy ondervind nie – jy kan jou grootste drome bewaarheid met harde werk en selfvertroue.
Inge was vanjaar baie betrokke by haar gemeenskap om bewusmaking en geld vir liefdadigheids- / maatskaplike sake waaroor sy passievol is te finansier. As ’n vrou van kleur wil sy die wêreld se persepsies van wat ’n skoonheidskompetisie is verander, aangesien sy vanjaar grense kon verbreek en stereotipes van “skoonheidstandaarde” kon uitdaag. Inge hoop om alle vroue oor die wêreld heen te inspireer dat ware skoonheid in jou hart lê en dat elke vorm, grootte en hoogte mooi is.
Om Mej. Auckland te wen as ’n vrou wat al baie uitdagings in die gesig gestaar het met wêreldverwagtinge van wat as ’n skoonheidskoningin beskou word, was ’n groot lewensveranderende oomblik vir Inge toe haar naam vir Mej. Auckland genoem is, aangesien sy die kans trotseer het en gewys het, ongeag watter hoogte of grootte jy is of waar jy vandaan kom, kan jy jou doelwitte bereik deur vertroue te hê in wie jy is en net hard te werk.
Vanjaar het sy baie liefdadigheids-inisiatiewe en grootskaalse liefdadigheidsgeldinsamelingsgeleent-hede ontwikkel en bestuur.
Inge het haar liefde vir uitvoerende kunste gebruik om te wys hoe dit genesend en voordelig vir mense se geestesgesondheid kan wees. Sy was vanjaar die regisseur van haar eie uitvoerendekunste-vertoning, insluitend ballet, professionele opera, kampioen baldansers en geestesgesondheids-voorstanders om geldinsameling en onderwys te verskaf oor die jeug se geestesgesondheid en selfmoordvoorkoming. Inge het ook ’n ballet-item gelewer en was ook ’n spreker by haar eie “Touch of class-” geleentheid.
Vanjaar het sy altesaam $6 114 ingesamel wat aan liefdadigheid geskenk is om jongmense met geestesongesteldheid in skole en gemeenskappe te help om die berading en ondersteuning te kry wat hulle broodnodig het.
Inge is ook baie passievol oor haar omgewing en het baie werk in haar gemeenskap gedoen om vir die aarde te sorg, om gemeenskapstuine te bou om diegene wat minder bevoorreg is te voed en is ook ’n ambassadeur vir Nieu-Seeland se top-omgewingsmaatskappy.
Inge se doel as ’n Mej. Auckland is om ’n leier en ’n rolmodel vir die jeug in Nieu-Seeland te wees en haar stem te gebruik om te pleit vir diversiteit en verteenwoordiging (vir mense van alle kulturele agtergronde / rasse om gelyke geleenthede te hê en aanvaar te word) sowel as vrouebemagtiging. Sy hoop om elke jongmens te inspireer om hul plek in die wêreld vol te staan en dapper en moedig te wees om risiko’s in die lewe te neem, net soos sy gedoen het.
Inge wil die Worcester-gemeenskap bedank dat hulle vir haar gestem het en haar al die pad gevolg het op sosiale media. Sy het gesê sy kon voel dat Worcester se gemeenskap in die gees saam met haar daar was op die kroningsaand en sy bedank almal vir hul ondersteuning. Dit beteken baie vir haar. Sy wil voortgaan om Worcester se naam hoog te hou in Nieu-Seeland.
