Die vier mans wat teregstaan weens die moord op die sake-eienaar Charl Munnik sal op 5 Augustus in die hof in Worcester verskyn.
Munnik is op 29 Februarie 2021 doodgeskiet nadat die vier verdagtes sy juwelierswinkel betree en sy ma aangerand het. Sy ma het na hom geroep om hom in kennis te stel van die rooftog.
Luidens hofdokumente het Munnik bo die winkel gewoon en by die trap afgehardloop met sy gelisensieerde vuurwapen. Skote is gevuur en Munnik is noodlottig in die kop getref. Die verdagtes het sy wapen en ander items gesteel.
Drie van die vier verdagtes is van Khayelitsha en is deur middel van gesigsherkenningstegnologie met die moord op Munnik verbind.
Twee van die vier verdagtes is op 1 Februarie onderskeidelik in Worcester en Kaapstad in hegtenis geneem. Die ander twee is op 9 Februarie in Mitchells Plain op die Kaapse Vlakte in hegtenis geneem. Die polisie het ook Munnik se gesteelde vuurwapen by hulle gevind.
Die vier staan ook tereg op die aanranding van Munnik se ma tydens die rooftog.
Een van die verdagtes, Ndyebo Dotwana, is in November 2021 op R5 000 borgtog vrygelaat. As deel van sy borgtog word hy nie toegelaat om in Worcester te bly nie en moet hy by ’n adres in Kraaifontein woon wat hy aan die hof verskaf het. Luyanda Lonzi en Sicelo Mase word albei in die Brandvlei-gevangenis aangehou vir die moord op Zoliswa Nkonyana in 2006. Awonke Ziqu word in Pollsmoor aangehou en sal na Worcester gebring word vir die vier se verskyning op 5 Augustus.
