Standard verneem dat iemand Dinsdag (2 Augustus) in hegtenis geneem is, maar teen druktyd is navrae aan die plaaslike polisie nog nie beantwoord nie.
Edwina Roux, Nicoll se niggie, vertel hoe almal hom sal onthou as die seun met die mooi maniere, ’n klein hart en sy groot glimlag.
“Almal het van hom gehou. Sy onderwysers was lief vir hom en almal het altyd gepraat oor hoe vriendelik hy is. Ons sal hom altyd mis. Hy laat ’n groot leemte in ons huis en in ons harte.”
Personeel van die skool het Dinsdag (2 Augustus) ’n verbyrydiens in herinnering van Nicoll se lewe gehou.
Zeatha Steyn, ’n skoolvriendin van Nicoll, het ’n huldeblyk op Facebook aan haar graad 11-klasmaat opgedra.
“Nicoll was ’n baie stil mens in die klas. Dit is baie hartseer, want ons het nooit gedink of verwag dat ons iemand in ons klas sal verloor nie. Toe die juffrou sê hy is afwesig, het dit diep geslaan, want hy is weg. Hy het my nog ’n paar dae voor die tyd gekomplimenteer oor my hare, en nou is hy weg,” skryf sy.
Die familie het hul dank betoon aan die speurders wat aan die saak werk, asook die onderwysers van Hoërskool Breërivier.
“Ons is baie beïndruk met die polisie se werk en ook vir die skool wat die familie so mooi ondersteun en hul eer betoon,” het Roux bygevoeg.
Nicoll sal Saterdag 6 Augustus vanuit die VGK Kerk in Riverview, Worcester, begrawe word.
