Ouers van skoolgaande kinders se monde het almal verlede week oopgehang toe hulle ingelig is dat talle onderwysers by verskeie skole in die pad gesteek is.
Ashton Sekondêre Skool en talle ander skole het verlede week deur middel van briewe ouers en leerders in kennis gestel dat hulle van die onderwysers by die skool moes laat gaan.
“Die onderwysdepartement het skole in kennis gestel van besparingsmaatreëls wat hulle ingestel het weens ’n geldtekort. Hierdie besparingsmaatreëls het tot gevolg gehad dat ons ses van ons opvoeders noodgedwonge moes laat gaan. Die skool het dus nou ’n tekort aan opvoeders,” lui die brief.
Bronagh Hammond, ’n woordvoerder vir die Wes-Kaapse Onderwysdepartement (WKOD), het gesê geen onderwysposte is egter beëindig nie.
“Dit moet duidelik gemaak word dat geen onderwysposte afgeskaf is nie. Kontrakposte is ook nie beëindig nie. Die kontrakte het op 31 Maart tot ’n einde gekom. Die WKOD het skole aangemoedig om kontrakte wat kwalifiseer, na permanent om te skakel, en 3 100 kontrakte is teen 31 Maart omgeskakel. ’n Verdere 800 word tans verwerk. Diegene wat verklaar dat hul kontrakte beëindig is, is na bewering diegene wat nie vir omskakeling gekwalifiseer het nie of nie hul kontrak hernu het nie.”
Sy verduidelik ook dat skole al in November daarvan in kennis gestel is.
“Ten einde bestaande poste te beskerm, het die WKOD in November verlede jaar ’n omsendbrief (Omsendbrief 0034) aan skole uitgereik wat aandui om die aantal onderwysers in die stelsel te handhaaf en ons verskeie kostebeperkings- maatreëls moes implementeer om ons loonverpligtinge na te kom aan die personeel in ons diens.”
Skole is dus dié geleentheid gebied:. Omskep Posvlak 1-kontrakposte in permanente poste, indien toepaslik gekwalifiseer, deur die omskakelingsproses teen 31 Maart. Die omskakelingsproses is aan die gang.. Enige Posvlak 1-poste (waar dit vakant en gefinansier is) wat nie deur die omskakelingsproses teen 31 Maart gevul is nie, kan gevul word deur ’n formele werwings- en keuringsproses te volg.. Wat kontrakposte betref – enige vakature van ’n goedgekeurde pos kan per kontrak gevul word tot 31 Maart. ’n Proses kan gevolg word, in oorleg met skooldistrikte, vir die kontrakte om tot 31 Desember verleng te word.
Die skool se brief verduidelik verder die skool het dus besluit om die gr. 8- tot gr. 12-klasse met een klas te verminder.
“Die WKOD het wyd oor bogenoemde met skole en verskeie vakbonde, beheerliggame en hoofdeverenigings gekonsulteer. Ons het ingestem om die implementering met een kwartaal uit te stel om te verseker dat ons skole gereed is om hierdie proses te bestuur. Alle skole het dieselfde omsendbrief op dieselfde tyd ontvang en moes die maatreëls wat in die omsendbrief vervat is, instel. Sommige skole het met omskakelings van poste of uitbreidings begin, terwyl ander werwings- en keuringsprosedures begin het om permanente personeel aan te stel,” verduidelik Hammond.
Verder noem sy baie skole het die nodige stappe voor die sperdatum voltooi.
“Baie skole het die nodige stappe gedoen om te verseker dat hulle die maatreëls soos uiteengesit in Omsendbrief 34 teen 31 Maart ingestel het.
“Sommige skole wag op uitstaande werwings- en keuringsnominasies of omskakelingsaanstellings. Die WKOD tree in om skole van geval tot geval te ondersteun. In sommige gevalle het onverwagte of laat bedankings van permanente personeel sake vererger.”
Sy herhaal die feit dat die aantal onderwysers op hul stelsels nie essensieel geword het nie.
“Dit moet egter duidelik gemaak word dat ons nie die aantal onderwysers wat ons in die stelsel het, beëindig of verminder nie en sal voortgaan om skole by te staan om in hul behoeftes te voorsien.
“Daar moet ook kennis geneem word dat die alternatief vir die maatreëls wat in Omsendbrief 34 uiteengesit is, was om die aantal poste te verminder. Dit was ’n stap wat ons nie bereid was om te neem nie.”
