Die Suid-Afrikaanse Maatskaplike Sekerheidsagentskap (SASSA) het die sperdatum vir begunstigdes om hul goudkaarte na nuwe swart Postbankkaarte te vervang, van 28 Februarie tot 20 Maart verleng, nadat wydverspreide uitdagings in die oorgangsproses ondervind is.
Die aankondiging kom nadat toelae-ontvangers regoor die land, insluitend in Worcester, aansienlike probleme ondervind het om hul nuwe kaarte te bekom. Die afgelope week het begunstigdes in Worcester lange rye by Shoprite trotseer, net om na ure se wagtyd sonder enige hulp weggewys te word.
In ‘n gesamentlike verklaring wat Vrydag, 14 Februarie uitgereik is, het die Departemente van Kommunikasie en Digitale Tegnologie en Maatskaplike Ontwikkeling die “diep kommer en frustrasies” van maatskaplike toelae-ontvangers erken. Die regering glo dat hierdie verlenging die nodige bykomende tyd vir die oorgang sal bied.
Hoewel begunstigdes aangemoedig word om die oorskakeling “so gou as moontlik” te doen, het die departemente verseker dat toelaagbetalings selfs na die sperdatum van 20 Maart sal voortgaan. Diegene wat teen daardie tyd nog nie hul kaarte omgeruil het nie, sal egter hul naaste Poskantoor-tak moet besoek om toegang tot hul fondse te verkry.
Die regering het aangekondig dat hulle verskeie maatreëls in plek stel om die huidige uitdagings aan te spreek. Dit sluit in die vermeerdering van menslike kapasiteit by dienspunte en die uitbreiding van die aantal oorgangsliggings landwyd. Mobiele kantore sal ook na landelike gebiede gestuur word. Die proses sal daagliks gemonitor word om vinnig op probleme te kan reageer, en daar sal met gemeenskapsleiers en plaaslike owerhede saamgewerk word om kommunikasie en bystand te verbeter.
Die departemente het beklemtoon dat hoewel SASSA-goudkaarte vanaf 20 Maart sal ophou werk, sal begunstigdes steeds na hierdie datum aansoek kan doen vir en hul Postbank-swartkaarte kan ontvang.
Die regering het aan besorgde begunstigdes belowe om gereelde opdaterings te verskaf en verseker dat ‘n gladde oorgang hul prioriteit bly. Die verlenging blyk ‘n direkte reaksie te wees op Postbank se klaarblyklike gebrek aan gereedheid vir die aanvanklike tydlyn, wat die behoefte aan ‘n meer gekoördineerde benadering tot hierdie belangrike verandering in Suid-Afrika se maatskaplike toelaagstelsel beklemtoon.
