Twee minderjarige meisies, albei van Zweletemba en van wie een doof is, gaan tans deur hel nadat ’n 69-jarige man wat aan hulle bekend is hulle na bewering by sy huis seksueel aangerand het.
AO Vathiswa Jacobs, ’n polisiewoordvoerder, sê die beskuldigde is Donderdag (30 Maart) in hegtenis geneem. Hy staan ook tereg op ’n aanklag van verkragting.
Volgens Jacobs het die verkragting 10 jaar gelede in Panorama in Worcester plaasgevind toe die beskuldigde die slagoffer, wat in daardie stadium 22 jaar oud was, glo na bosse geneem, haar gedreig en toe na bewering verkrag het.
Die beskuldigde het Maandag (3 April) in die landdroshof in Worcester verskyn op twee aanklagte van seksuele aanranding en ’n klag van verkragting.
Terwyl die hofsitting Maandag aan die gang was, het die kinders se ouers saam met nog ’n paar vroue voor die Worcester-landdroshof ’n vreedsame plakkaat-betoging gehou met plakkate wat onder meer lui “Stop Rape” en “We want Justice”.
Die 13-jarige dowe meisie is na bewering op Dinsdag (28 Maart) omstreeks 13:00 seksueel aangerand, terwyl die 11-jarige meisie na bewering op Saterdag (25 Maart) omstreeks 14:30 ook seksueel aangerand is.
Volgens die ma van die 13-jarige meisie het ’n buurvrou kort na die voorval na haar toe gekom en haar gevra of haar kind haar vertel het wat die oom aan haar gedoen het. Sy sê die beskuldigde is die eggenoot van die vrou wat na haar kinders omsien terwyl sy by die werk is.
Die ma sê sy het haar kind gekonfronteer waarna die kind haar meegedeel het die beskuldigde het met haar gepeuter. Sy sê ’n mediese ondersoek het dit bevestig.
Volgens die ma weet sy nie hoe lank die beweerde misdrywe nou al duur nie. Sy sê dit is hartseer dat haar kind deur so iets moet gaan, want niemand wil dit aan enige kind gedoen hê nie.
Die ma van die 11-jarige kind het met trane in haar oë aan Standard vertel dat haar kind Saterdag (25 Maart) by die beskuldigde se huis was, op soek na ’n maatjie.
Sy sê die beskuldigde het haar kind toe meegedeel die maatjie is nie daar nie, maar dat sy in die huis moet inkom.
Volgens die ma het die beskuldigde glo die onderdeur toegemaak, die kind se broek afgetrek en haar na bewering seksueel aangerand.
Die ma sê toe die beweerde voorval plaasgevind het, het haar broerskind agter ’n bed in die huis weggekruip.
Volgens die ma het die kind aan die beskuldigde gesê hy moet dit nie doen nie. Die ma sê haar dogter het vir haarself aartappelskyfies gaan koop nadat die beskuldigde R5 in haar hand gestop het.
Volgens die ma het ’n maatjie van haar dogter haar ma vertel wat gebeur het waarna sy (die ma van die slagoffer) ingelig is.
Die saak teen die beskuldige is uitgestel tot 11 April. Hy bly in aanhouding.
- Intussen is borgtog Maandag (3 April) in die landdroshof in Worcester geweier aan die 43-jarige man wat na bewering sy 14-jarige stiefdogter vroeg in Maart in sy huis in Avianpark verkrag het. Die saak is uitgestel tot 5 Junie.
Die meisie se oupa het na afloop van die borgtog-verrigtinge aan Standard gesê hy is verlig en verheug oor die uitspraak. Volgens hom sal hy op sy gelukkigste wees as die beskuldigde gestraf word.
“Die saak beweeg nou in die regte rigting,” sê hy.
Hy sê geweld teen kinders is ’n kritieke menseregte- en openbare gesondheidskwessie. Volgens hom word daar dikwels gefokus op die slagoffers van seksuele misdrywe, terwyl daar ’n behoefte is aan meer navorsing met betrekking tot voorkoming en intervensie.
