Al is daar ietwat verligting ná die identifikasie van die motor wat Marscha Smit doodgery het, glo haar familie nie dat geregtigheid sal geskied nie.
Smit was die tweede slagoffer van ’n tref-en-trap-ongeluk op die R43 tussen Ceres en Wolselely. Standard het oor haar tragiese dood berig (Nog ’n vrou sterf in tref en trap, 11 Augustus).
’n Paar weke voor Smit se dood is ’n ander jong vrou, Michelle Tolie, ook op dieselfde pad dood.
Volgens Smit se oom, Jakobus Mowers, is die bestuurder van die voertuig wat haar niggie doodgery het, uitgeken danksy kameras by die plaas Hartebees.
“Ons is bly dat hy geïdentifiseer is, maar ons glo nie geregtigheid sal geskied vir die dood van ons dogter nie,” sê hy.
Mowers verduidelik sy verklaring verder deur te sê die ondersoekbeampte het vir hulle gesê hy dink niks gaan van die saak kom nie.
“Dit laat ons vertroue in die regstelsel verloor omdat die saak nog nie eens hof toe gegaan het nie, maar die ondersoekbeampte verwag reeds mislukking en dit maak ons ??as familie hartseer omdat ons iemand verloor het wat ons waardeer het.”
Nadat hy die opdatering op sy Facebook-profiel gedeel het, sê Mowers ’n paar families wat dieselfde reaksie van dieselfde ondersoekbeampte ervaar het, het dit genoem.
Hy het verder gesê hulle is die vyfde gesin wat aan die kortste ent van die regstelsel trek.
’n Navraag oor die vordering van die ondersoek is na die polisie se woordvoerder gestuur en die reaksie sal gepubliseer word.
