Anton Bredell, die Wes-Kaapse minister van plaaslike regering, omgewingsake en ontwikkelingsbeplanning, het die Kaapse Wynland-distriksmunisipaliteit geluk gewens met die erkenning van die Suid-Afrikaanse Vereniging vir Plaaslike Regering (Salga) vir die uitstekende werk wat hulle in hul kommunikasie-afdeling doen.
Salga het op Maandag 11 Desember die afdelingswenners op sy sewende nasionale kommunikatorsforum-prysuitdeling aangekondig.
“Munisipaliteite moet basiese dienste aan hul inwoners verskaf. Maar dit is ook van kritieke belang om oor die status van hierdie dienste aan inwoners te kommunikeer. Ons sien dat reaktiewe en eerlike kommunikasie, veral gedurende tye wanneer dienste onderbreek word, ’n groot rol vervul in die bestuur van verhoudings tussen die plaaslike owerhede en die inwoners wat hulle bedien,” het minister Bredell gesê.
Die Kaapse Wynland-distriksmunisipaliteit is erken as die mees geprofileerde munisipaliteit wat betref mediamonitering. Die Kaapse Wynland-span is erken daarvoor dat hy baie reaktief is met betrekking tot media- of openbare navrae, bestendig in die skep van platforms vir openbare betrokkenheid, aktief private openbare vennootskappe deur kommunikasie-inisiatiewe aanmoedig en voortdurend interregeringsverhoudinge bevorder om te verseker dat sy burgers oor alle munisipale nuus en inligting op hoogte gehou word.
Die Tuinroete-distriksmunisipaliteit is erken as die mees proaktiewe en responsiewe distriksmunisipaliteit wat kommunikasie betref. Die Tuinroete is ook erken as die mees vernuwende kommunikasiespan vanweë sy vernuwende maniere om kommunikasie-instrumente soos KI-tegnologie te gebruik om sy kommunikasieplatforms en aanbiedinge aan sy burgers te verbeter.
“Ek is trots op hierdie prestasies van ons Wes-Kaapse munisipaliteite. Dit is waar dat jy nie ’n diensleweringsprobleem net deur kommunikasie kan oplos nie, maar goeie kommunikasie help om die bemagtigende omgewing te skep vir die ander spanne om hul werk te doen, asook om staatsamptenare teenoor die publiek aanspreeklik te hou,” het Bredell gesê.
