’n Boorling van Worcester, Joslyn Yvette du Toit (33), is ’n vrou met krag en doelgerigtheid, gebore en getoë in die lewendige, dog uitdagende Roodewal-woonbuurt. Sy staan fors en verteenwoordig haar gemeenskap met trots.
Joslyn se verhaal is een van triomf oor teëspoed, ’n bewys van die krag van geloof in haarself.
“Toe ek grootgeword het, het ek my passie vir skoonheidskompetisies en mode by die Laerskool Roodewal ontdek. Ek het op hoërskool, by Esselenpark Sekondêr, geleer om my uniekheid te omhels en troos in my eie vel te vind,” sê Joslyn.
Ten spyte daarvan dat sy geboelie is, het sy sterk gestaan en na vore gekom as ’n baken van veerkragtigheid toe sy in 2007 gematrikuleer het.
Joslyn het ná skool gaan werk en haar drome om ’n modeontwerper en onderwyser te word, uitgestel. Uiteindelik, in 2013, het sy ’n geloofsprong geneem deur by Educare aan die Boland TVET-kollege in Worcester in te skryf en het in 2016 gegradueer. In 2021 het sy ’n voltydse kursus in menslike-hulpbron-bestuur gevolg, wat tot haar N6-sertifisering in 2023 by die Boland TVET-kollege gelei het.
Sy floreer deesdae as ’n assistent-onderwyser by die Laerskool Esselenpark. “Dit is waar ek ’n kans kry om ’n positiewe invloed op die lewe van kinders en kollegas te maak.”
Joslyn se poging tot modelwerk met Boland Pageants en TSGC Model Management, onder Cresswill Levendal se leiding, was “transformerend”.
“Dit het my eiewaarde en vasberadenheid versterk om stereotipes te verbreek.”
As die huidige Mev. Boland 2022 is sy ’n trotse voorstander van diversiteit en liggaamspositiwiteit.
Joslyn, wat passievol oor selfagting en selfvertroue is, het die Joslyn du Toit- Mev. Boland 2022- Facebook-blad begin.
“My missie is om body shaming te bekamp en mense te herinner dat die lewe ’n geskenk is wat die moeite werd is om te koester. Ek leef deur sosiale media om ander te bemagtig om hulself te omhels.”
Met die Mev. Westelike Provinsie-platform beoog Joslyn om body shaming af te breek. Haar boodskap is duidelik: ’n Mens se verhouding met jou liggaam moet gegrond wees op liefde en aanvaarding, nie haat nie.
Joslyn se reis was nie sonder uitdagings nie. Haar gesondheidsprobleme en vorige ervarings definieer haar nie; dit het haar veerkragtigheid gesmee. Haar missie is om jong vroue, veral dié uit uitdagende agtergronde, te inspireer.
Gemeenskapsbetrokkenheid is Joslyn se sterkpunt. Sy werk saam met verskeie liefdadigheidsorganisasies in die Worcester-omgewing.
Haar filosofie is: “Jy het nie rykdom of roem nodig om ’n verskil te maak nie; jy het net ’n gewilligheid nodig om ’n helpende hand te gee.”
Joslyn stel haarself voor as ’n leier in die skouspelwêreld en streef daarna om die eerste Plus Sized-Mev. SA te word.
Haar fokus is tans daarop om die titel van Mev. Westelike Provinsie 2023 te beklink. Terselfdertyd streef sy daarna om ’n dryfveer agter liefdadigheidsorganisasies wat tot gemeenskapsgroei bydra, te wees. Sy moedig almal – oud en jonk – aan om hulle daartoe te verbind om ander te help. Haar invloed strek verder as die kompetisie aangesien sy individue versoek om hul eie waarde te erken, hul metaforiese krone te dra en in hul eie unieke skoonheid te glo.
. Kontak Joslyn by 066 227 8453 en ondersteun haar in haar reis om Mev. Westelike Provinsie 2023 te word.
