HTS Drostdy se sonkragaanleg is Dinsdag (12 Desember) amptelik in werking gestel.
Sun Exchange, ’n toonaangewende verskaffer van sonkrag- en energiebergingsoplossings, het Dinsdag die bekragtiging van die 470,88 kW- sonkrag- plus 700 kWh-bergingsprojek aangekondig om HTS Drostdy aan te dryf. Die sonkragprojek is die grootste wat ’n skool in die Wes-Kaap van krag voorsien en is nou lewendig en wek skoon, betroubare elektrisiteit op.
Deur ’n motorafdakstruktuur vir sonkrag te gebruik, sal die projek meer as die helfte van die 120-jarige skool se energiebehoeftes dek. Die geïntegreerde batteryberging sal HTS Drostdy se meer as 1 000 leerders teen die invloed van beurtkrag, insluitend klaskamers, laboratoriums, koshuise en ander fasiliteite, beskerm. Die aanleg stel die skool ook in staat om klimaatsimpakte te versag deur ongeveer 13 000 ton koolstofvrystellings in sy leeftyd van 20 jaar te vermy.
Deur nou saam met HTS Drostdy te werk om die skool se prioriteite noukeurig te verstaan, het Sun Exchange die ingewikkelde ontplooiingsproses gedryf, insluitend die maatontwerp van die projek om in HTS Drostdy se spesifieke energiebehoeftes te voorsien. As deel van sy holistiese aanbieding van sonkragoplossings het Sun Exchange ook finansiering gefasiliteer van die internasionale onafhanklike kragprodusent (IPP), CVE South Africa, wat nou die sonkragprojek besit en dit sal bestuur en bedryf vir sy 20-jaar-leeftyd. Sun Exchange het ook die koördinering bestuur oor alle ander projekbelanghebbendes, insluitend die Wes-Kaapse Onderwysdepartement (WKOD), die Breedevallei-munisipaliteit en Dorman Energy, die projek se ingenieurs-, verkrygings- en konstruksievennoot (EPC).
“Met die groot sonkragbronne wat in die Wes-Kaap tot ons beskikking is, kan ons ’n groot positiewe invloed op kinders se opvoeding met sonkrag en energieberging hê,” het David Maynier, die Wes-Kaapse minister van onderwys, gesê. “Nie net kan ons meer veerkragtige skole, wat beskerm is teen die skade van voortdurende beurtkrag, skep en energiekoste verminder nie, maar ons kan ook ’n kragtige les oor volhoubaarheid en klimaatsaksie direk in die skoolomgewing bring.”
Louis Steijn, HTS Drostdy se hoof, het gesê: “HTS Drostdy berei jongmense voor om die toekoms positief te transformeer. Die ontplooiing van die sonkragaanleg en battery was vir ons ’n belangrike strategiese besluit om ons leerders eerste te stel en ’n betroubare stroom skoon elektrisiteit vir die nuutste klasse, soos robotika, 3D-ontwerp, kodering en ander tegniese vakke, sowel as ons koshuise, te verseker. Om die aanleg in aksie te sien, is ’n leergeleentheid op sigself vir ons leerders. Om Sun Exchange as ’n betroubare vennoot te hê, was noodsaaklik vir die sukses van HTS Drostdy se sonkragreis,” het Steijn gesê.
“Deur toegang tot betroubare hernubare energie vir onderwys in Suid-Afrika te ontsluit, pas die HTS Drostdy sonkrag-plus-berging-projek by CVE se etos, wat mense en die planeet in die middel van môre se energie plaas,” sê René Laks, hoofbestuurder van CVE Suid-Afrika. “Ons is trots om deel te wees van ’n projek wat die dwarslat opskuif vir wat in sonkrag en batteryberging vir skole moontlik is.”
“As die grootste sonkragprojek vir ’n skool in die provinsie is ons geëerd dat HTS Drostdy sy vertroue in Sun Exchange plaas om hierdie baanbreker-sonkrag- en bergingsprojek ’n werklikheid te maak,” het Saul Wainwright, uitvoerende hoof van Sun Exchange, gesê. “Ons is verheug om ons span se diepgaande wêreldklas-ervaring toe te pas om skoon, veerkragtige energie toeganklik, bekostigbaar en maklik vir skole en ander organisasies oor Suid-Afrika heen te maak.”
