Tamia Maarman (16), ’n matriek-leerder aan die Hoërskool Breërivier in Worcester, pronk in Malvie, ’n Franse modetydskrif, se Mei-uitgawe en steel Worcesteriete se harte met haar skoonheid.
Volgens Maarman het sy ’n fotosessie met Les-Lee Lesch, ’n portret- en modefotograaf van Worcester, gedoen, en toe sy haar oë uitvee, het sy vasgekyk in haar gesig in ’n Franse modetydskrif.
Maarman het twee jaar gelede haar modelloopbaan begin by die TSGC modelagentskap in Worcester.
Hier het sy verskeie modelvaardighede aangeleer, soos om op die loopplank te loop, hare en grimering te doen, en te poseer vir foto’s.
Standard het uitgereik na Lesch wat telefonies vertel het sy het besluit om Maarman se foto’s vir die tydskrif in te skryf om vir haar meer blootstelling te gee, en sodat sy raakgesien kan word.
Volgens Lesch het Maarman hope talent, en was dit vir haar belangrik om Maarman bloot te stel.
Lesch het gesê dat sy die foto’s vir Malvie gestuur en vir ’n betaalde plasing gevra het, waarop die Franse tydskrif ingestem en vir Maarman op ’n volblad in die tydskrif geplaas het.
Hierdie Worcesterse skoonheid het telefonies aan Standard verduidelik dat haar toekomsdrome insluit om lugwaardin-studies te voltooi, en voort te gaan om deeltyds haar modelwerk te beoefen.
Sy sê dat dit ook haar droom is om aan Mej. Suid-Afrika deel te neem, om op die televisie te verskyn vir haar modelwerk en om in die tydskrif Vogue te verskyn.
In haar vrye tyd, sê Maarman, is sy passievol oor liefdadigheidswerk en het onlangs seniors in Worcester se hare gedoen en hul naels mooi gemaak.
Volgens Malvie se webtuiste fokus dié Franse tydskrif op alles omtrent modes en berig oor die jongste giere en klerereekse, vasgevang deur die lense van modefotograwe en modelle wat met nuwe modes pronk.
