’n Bekende en geliefde inwoner, Cindy Etzebeth (42) is op Woensdag 14 September skielik oorlede nadat sy aan ’n hartaanval gesterf het.
Cindy was welbekend vir die vele rolle wat sy in die gemeenskap gespeel het.
Gebore in Beaufort-Wes, verhuis Cindy in 2010 na Worcester. Hier vestig sy haarself en begin later haar eie besigheid genaamd, Jessies on Church, ’n klerewinkel geleë in Kerkstraat. Gekoppel aan Jessies Nature Inspired, vestig sy in ’n kort tydjie vir haarself ’n naam as entrepreneur. Sy open later Cindy’s Kitchen en verweef hier haar passie vir goeie kos en vriendelike diens.
Cindy se skoonsuster, Yolande Fourie, vertel aan Standard dat sy baie lief was vir mense en sy ’n passie gehad het om ander te help.
“Cindy se passie was om haar medemens te help en ’n verskil in mense se lewens te maak. Sy het altyd die belange van ander op haar hart gedra. Daar was altyd tyd vir ’n geselsie en om grappies maak. Buiten haar besighede was sy ook betrokke by Worcester Toerisme en het hier op die bestuur gedien.”
Op Woensdag 14 September het Cindy nog die oggend gaan oefen en vir ’n vriendin vertel dat sy baie goed voel. Enkele ure later is Cindy tragies van haar familie weggeneem.
“Cindy se afsterwe was baie onverwags. Sy was baie opgewonde oor die lewe en het gesê dit gaan n goeie dag wees. Sy het die oggend nog baie opgewonde beplan wat vir die dag op die spyskaart gaan wees by haar winkel. Min het ons almal geweet dit is haar laaste dag,” voeg Fourie by.
Alhoewel sy nie kinders van haar eie gehad het nie, was haar familie se kinders vir haar soos haar eie.
“Sy het hul bitter baie lief gehad. Sy was altyd reg om die kinders te bederf, reg om hul uit te neem en tyd saam met hulle te spandeer. Die kinders was ook altyd opgewonde om altyd oor te slaap by tannie Cindy. Elke Kersfees het sy seker gemaak die familie kom bymekaar sodat die kinders dit kan geniet en kan leer dat families belangrik is,” voeg Fourie by.
Ethan Etzebeth, Alexa Etzebeth, Diniel van der Mescht, Ané Etzebeth, Janke Jordaan, Eva Blom, Swayne Fourie en Nina Fourie sê aan Standard dat hulle hul geliefde tannie reeds baie mis.
“Tannie Cindy, ons gaan jou so bitter baie mis. Ons was baie lief vir jou.”
Cindy was ook verloof aan Willem “Baby” Jordaan en almal beaam dat Baby haar alles was. Talle inwoners het ook hierdie tragiese nuus wyd op sosiale media gedeel en almal spreek van die vrou wat se hart groter was as wat haar hand oop was vir diegene in nood.
Haar lewe sal op Donderdag 22 September om 14:00 by die Lions-klub in Worcester gevier word.
Haar verloofde, Willem, haar broers, Edwin, Kobus en Dewald, haar suster Chantel, en haar skoonsusters, Jessica, Christina, Lizmar en Yolande het vir Cindy vir oulaas ’n brief geskryf.
