Ná byna twee jaar waarin geen skolesport gespeel is nie het ’n ywerige rugbyspeler van Worcester uiteindelik sy provinsiale kleure verwerf.
Amaan Adendorff (15), kaptein van die Hoërskool Esselenpark se o.16-rugbyspan, is gekies vir die Westelike Provinsie-span, wat van 11 tot 15 Julie aan die Winterspele in Benoni gaan deelneem.
Die Westelike Provinsie-span bestaan ??uit spanne van die Westelike Provinsie, SWD en Boland.
Vasberadenheid en passie vir die spel is van kleins af integrale temas in sy lewe. Adendorff is as die beste o.13-rugbyspeler gekroon toe hy net 12 jaar oud was.
“My liefde vir die sport en net die gevoel om ’n bal vas te hou, is wat my op rugby verlief gemaak het en ook wat my gedryf het om beter te wil vaar elke keer as ek op die veld draf,” sê Adendorff.
Die flank het homself nog altyd bo spelers van sy ouderdom uitgedaag. Alhoewel daar ’n span vir sy ouderdomsgroep by sy skool is, verkies hy om in ’n hoër span te speel sodat hy voorbereid en vertroud is met die soort spel teen die tyd dat hy amptelik in daardie ouderdomsgroep moet speel.
Vir Adendorff is dit sy eerste keer dat hy provinsiale sport beoefen en hy skryf al die sukses aan harde werk toe. “Harde werk word beloon. Ek is trots op myself dat ek die span gehaal het en ek is ook bly om my ouers trots te kon maak.” Om sy vasberadenheid te bewys, oefen hy ook op sy eie.
Verder sê hy oor sy keuse die pandemie het baie dinge weggeneem en hy is dankbaar dat almal weer sport kan beoefen.
In sy antwoord op die vraag oor wat sy drome insluit, sê hy: “Ek sal graag groot rugby wil speel – miskien begin met ’n span soos die Pumas en dan uiteindelik die Groen-en-Goud dra.”
