’n Omstrede brief doen die ronde wat allerhande aantygings teen die eienaar van ’n plaaslike dierewelsynorganisasie maak.
Standard het hieroor met Juenieta Everson, wat die onderwerp van die brief is, gesels. Die brief se hofie, Dringende waarskuwing, is in rooi hoofletters geskryf. Die brief beskuldig haar daarvan dat sy onskuldige diere van ’n ander dierewelsynorganisasie onnodig uitgesit het.
“Vir die publiek beweer sy altyd dat sy pro-lewe is en sterk daarteen gekant is om diere uit te sit. In plaas daarvan om met ander dierewelsynorganisasies in die omgewing saam te werk, gaan sy voortdurend uit haar pad om dié wat sy as opposisie beskou, te vernietig, selfs al beteken dit dat hulle hul diere doodmaak, insluitend babahondjies. Vra waar sy op Maandag 29 Mei 2023 was, wat sy gedoen het en hoekom. Hierdie was nie siek honde nie, hulle was gesonde diere wat aan ’n ander dierewelsynorganisasie behoort het,” lui die brief.
Vroeër vanjaar was daar ’n situasie waarin Everson glo deur die hof beveel is om die perseel van ’n ander dierewelsynorganisasie te betree om te help met siek honde wat glo gely het.
Sy het verlede Donderdag die brief, wat glo aan talle mense en diere- organisasies gestuur is, gekry. Standard het ook aan die begin van hierdie week die brief in sy posbus gekry.
“Iemand by ’n organisasie in ’n ander dorp het dit vir my gestuur en vir my gesê ek moet eers koffie drink en ’n sigaret rook voordat ek dit lees. Maar toe ek dit lees, het ek gelag, want wat daarin staan, is waansinnig. Dis lasterlik.”
Die brief lui verder: “Die personeel wat by die ander organisasie gewerk het, is absoluut verpletter en erg getraumatiseer deur wat hulle moes aanskou en beleef.”
Hieroor sê Everson dat twee van die einste personeel nou by Sandy’s Eden werk.
Die brief beskuldig haar ook daarvan dat sy leuens versprei om haar sogenaamde oortredings toe te smeer.
“Sy sê die dierewelsynorganisasie wie se diere sy doodgemaak het, het haar gevra vir hulp met ’n hondesiekte-uitbreking – dis nie waar nie. Sy vertel vir mense dat net drie honde van kant gemaak is – dis nie waar nie. Die lys van leuens gaan aan en aan. Hierdie is ook nie ’n geïsoleerde voorval nie, dit gaan al vir baie jare aan. Gaan dit oor mag, ego, beheer? Of gaan dit oor geld? Probeer sy om alle moontlike skenkings of borgskappe vir haarself te verseker?”
Everson sê sy het ’n vermoede wie agter die brief sit.
“Daar is tans ’n deurlopende ondersoek aan die gang. Ek wil nie te veel daaroor praat nie, want ek wil nie die ondersoek belemmer nie.”
Die brief maak ook melding van die strafregtelike saak.
