’n Saamstaan-kultuur is vinnig besig om in Saldanha te vorm.
Kapt. Tania Helfrich, ’n polisiewoordvoerder van die Weskus-distrik, sê dis ’n riem onder die hart om te sien hoe die Saldanha-gemeenskap, plaaslike sakelui, liefdadigheidsorganisasies, buurtwagte en veiligheidsmaatskappye saamstaan om van Saldanha ’n veiliger dorp vir alle inwoners te help maak.
Die goed gevestigte Saldanha-buurtwag help ook graag die dorp se ander opkomende buurtwagte in ’n poging om buurtwag-vrywilligers te bemagtig om hul gebiede op die beste wyse moontlik te bedien.
Onlangs het die Saldanhabaai-buurtwag weer patrolliefietse aan die Tabakbaai-buurtwag geskenk.
Koffie, melk en suiker is ook geskenk sodat vrywilligers, wat snags patrolliediens doen, op en wakker vir hul skof kan wees.
