Deon Roux, die bekende en kreatiewe kunstenaar van Tableview, wat sy produkte onder die naam Deoux bemark, kom stal van sy skilderye en boeredekor op Vredenburg uit.
Deon het al verskeie uitstallings gehad en ook heelparty pryse op feeste en skoue losgeslaan, onder meer silwer medaljes by die Gariep Kunstefees in Kimberley en by die Swartlandskou.
Hy het ook uitstallings gehou by die Vryfees in Bloemfontein, Inniebos in Nelspruit, KKNK in Oudtshoorn en ook in Uppington.
Roux is veral bekend vir sy half-deurgesnyde skeppings, want, soos hy verduidelik: “Jy kan tog net eenkant van ’n produk sien.”
Die meeste van sy dekor is natuurlik unieke skeppings want alles is oorspronklike artikels wat gebruik word en daar is so min van hierdie oudhede nog beskikbaar.
Hy het van die standpunt uitgegaan om uitheemse kuns teen bekostigbare pryse te verkoop.
Kopers het al van sy geskilderde deure aan die kant van hul bakkie vasgemaak en teruggery plaas toe.
Deon stal ’n groot verskeidenheid unieke dekor uit wat elke smaak en sak sal pas.
Deon se uitstalling is te sien by die Weskus Kersmark vanaf 14 tot 22 Desember in die Hoërskoolsaal in Vredenburg.
