Die Meeulander-motorfietsklub het Saterdag (24 Junie) sy jaarlikse blikkieskos-insamelingsveldtog, die Meeulanders Tin Run, gehou.
Ander motorfietsklubs en Weskussers het die koue weer getrotseer om blikkieskos en ander nie-bederfbare produkte by die insamelingspunte by die Ipic-winkelsentrum in Vredenburg, die Laguna Mall by Langebaan en die Spar in St. Helenabaai te kom aflaai.
Die Meeulander-motorfietsklub is al 26 jaar oud, en dié insameling is een van sy grootste jaarlikse liefdadigheidsprojekte.
Errol le Roux, ’n pastoor by die Weskus Lighuis AGS-kerk, het almal vir hul bydraes bedank.
Die ingesamelde kos en skenkings gaan by dié kerk se welstand-sentrum aangewend word.
“Gister was hierdie rakke leeg; nou kan ons bedien en help. ’n Woord van dank aan die publiek en ons ander motorfietsklubs.
“Saam maak ons tog ’n verskil . . .”
