Elke dag is Mandeladag by die Hoopsig-projek in Paternoster.
Op elke weeksdag begin die middagprogram met ’n warm ete vir tussen 60 en 70 leerders. Daarna volg huiswerktyd en teen 15:00 is dit tyd vir ’n verskeidenheid werksessies.
Op Mandeladag het dié projek besoek van sy korporatiewe maatskaplike skenker, MUA, en die Cape Sea Harvest-stigting ontvang. Die dag se program het beide die jong leerders en jeugprogram YEP ingesluit. Die tema van die dag, “One hand feeds the other”, is die oggend van stapel gestuur toe die departement van gemeenskapsontwikkeling en die Hoopsig YEP-program ’n groentetuin geskep het. Die middag is grootliks aan ’n Storiehoek-werksessie gewy.
