Warren Carolus (48) het Maandagoggend 24 Augustus in die hospitaal aan vermoedelik ’n hartaanval gesterf.
Carolus was ten tye van sy dood die voorsitter van die Atlantis-gemeenskapspolisiëringsforum en het diep spore in die gemeenskap getrap.
Carolus, ’n voormalige MK-soldaat, was ook die hoofveiligheidswag van die voormalige minister van veiligheid en sekuriteit, oorlede Steve Tshwete.
Carolus, die pa van drie en oupa van een, was ook tydens 2010 se sokker-wêreldbekertoernooi in Suid-Afrika verantwoordelik vir die veiligheid van belangrike gaste by die Kaapstad-stadion.
Boodskappe van medelye het op sosiale media ingestroom. Carolus laat sy vrou Esmerelda en drie dogters en een kleinkind agter. Teen druktyd was die begrafnisreëlings nog onbekend.
