Ongeveer 24 leerlinge van die skole Saxonsea-, Hermes- en Grosvenor Primêr en Saxonsea Sekondêr het op 1 Junie blootstelling aan ’n kinderbeskerming-bewusmakingsprogram ontvang.
Die dag is moontlik gemaak deur die ATKV-tak van Atlantis, wat leerders bewus gemaak het van kinderbeskerming.
Kinders het die geleentheid gehad om te reageer op vrae wat aan hulle gestel is net om te sien of hulle die konsep verstaan, en baie van hulle was positief oor wat hulle geleer het.
Volgens statistiek ervaar een uit elke vier kinders in Suid-Afrika die een of ander vorm van mishandeling in hul kinderjare. Hierdie mishandeling kan fisieke, seksuele en emosionele mishandeling of verwaarlosing insluit.
Die ATKV-tak Atlantis het die kinderbeskerming-bewusmakingsprogram van stapel gestuur om kinders in te lig oor hul regte en hoe gemeenskappe die kwesbaarste – die kind – kan beskerm.
Volgens Christine Lewis, die programkoördineerder vir die tak, sluit die belangrikste bekommernisse rakende kinderbeskerming onveilige ruimtes, armoede, verwaarlosing, afknouery, kinderhandel en -ontvoering, en aanlyn en seksuele uitbuiting in.
Dit wek nie net kommer vir die organisasie nie, maar sy voel wel kinderbeskerming moet as ’n geïntegreerde benadering hanteer word – ten minste in hul uitreik na die kwesbaarstes in die gemeenskap.
“Geen organisasie kan alles oor kinderbeskerming doen nie, maar elke organisasie vervul ’n belangrike rol in opvoeding, en saam kan ons verder beste praktyke binne ons gemeenskappe bou,” meen Lewis.
Boodskappe en gebede van ‘ons dink aan julle’ en ‘ons hoop die oorlog sal binnekort iets van die verlede wees’, is aan die geteisterde kinders van Oekraïne as ondersteuning gestuur.
Die projek is afgesluit met ’n piekniek in die agterplaas by die voorsitter, Annie Cruywagen, se huis, waar die kinders ter viering van die internasionale kindervakansiedag, wat op 1 Junie gedenk is, verskeie speletjies gespeel het.
