Dit was die woorde van kapt. Lisa Munro, polisiewoordvoerder van die Atlantis-polisiekantoor terwyl daar steeds wyd gesoek word na die verdagte verantwoordelik vir die dood van sers. Aidan Mahoney (44).
Mahoney is Woensdagmiddag (17 April) met sy eie dienspistool in Mamre doodgeskiet. Volgens Munro het die polisie ’n klagte van gesinsgeweld in Klapmutsstraat ontvang waarop Mahoney en sy kollega reageer het. Munro sê Mahoney het sy kollega gevra om by die agtervenster te wag net ingeval die verdagte probeer ontsnap.
Die verdagte het egter Mahoney na bewering oorrompel en van sy dienspistool beroof voordat hy die polisielid twee keer geskiet, en ook op die ander lid losgebrand het. Hy het daarna te voet gevlug.
Volgens omstanders op die toneel is die verdagte ’n bekende tikkop wat gereeld sy suster aangerand het en by wie die polisie al verskeie kere besoek by dié betrokke adres afgelê het.
Emosionele familie van Mahoney wou ten tye van die beriggewing nog nie met die media praat nie. Volgens Munro het die verdagte met die dienspistool gevlug en is hy gewapen en gevaarlik.
Klagtes van moord, poging tot moord en roof van ’n vuurwapen word ondersoek.
