Honderde rouklaers het Saterdag die begrafnis van die vyfjarige Xavier Mitchell bygewoon.
Xavier is verlede week dood toe die broer van sy oppasser hom drie keer met ’n mes in die rug gesteek het. Die verdagte is verlede week in die hospitaal opgeneem nadat lede van die gemeenskap hom aangerand het omdat hy die seuntjie na bewering vermoor het.
Hy is intussen ontslaan en is na die Valkenberg-hospitaal vir waarneming verwys omdat hy glo geestelik versteurd is.
Honderde mense het met taxi’s en busse by die begrafnis by die Belhar-begraafplaas opgedaag.
Sers. Samantha Adonis, polisiewoordvoerder by die Bishop Lavis-polisie, het die begrafnis bygewoon en sê dit was hartroerend.
“Dit was verblydend om te sien hoe die gemeenskap die familie kom ondersteun het. As ons gemeenskap so kan saamstaan, kan ons die geveg teen misdaad in ons gemeenskappe wen. ’n Begrafnis soos dié laat weer ’n mens die lewe waardeer, want so ’n jong kind se lewe is sinloos weggeruk. My hart gaan uit na die ouers en ek hoop hulle sal eendag berusting vind,” sê Adonis.
Volgens Adonis het die verdagte Maandag in die hof verskyn. “Die verdagte het mediese evaluering ondergaan om sy sielkundige toestand te bepaal en of hy geskik is om in die hof te verskyn,” sê sy.
