Itriam Leukes, ’n plaaslike fietsryer van Malmesbury, het pas sy vyfde Kaapstad-fietstoer voltooi nadat hy die 109-km-afstand in vier uur 38 minute en sewe sekondes teen ’n gemiddelde spoed van 62,7 km/h voltooi het.
Leukes is deur sy voormalige sakevennoot, ’n Comrades-hardloper, geïnspireer. Hy het sy medewerkers in 2012 belowe dat hy vir die Kaapstad-fietstoer sal inskryf, maar elke jaar het hy ’n verskoning gehad totdat een van sy kliënte hom in 2019 ingeskryf het.
Ongelukkig kon hy nie die toer voltooi nie omdat hy op Chapmans Peak in ’n ongeluk was, maar het sy eerste ren in 2020 voltooi.
Leukes se tyd van vyf uur in sy eerste Kaapstad-fietstoer het elke jaar verbeter en vanjaar het hy die ren in minder as vier uur en 38 minute afgesluit. Volgens Leukes was die eerste 40 km uitdagend met ’n stywe briesie ná Simonstad.
Dié plaaslike fietsryer se vier doelwitte vir die toer is eerstens om die ren te voltooi, tweedens om pret te hê, derdens om die ervaring werklik te geniet, en vierdens “om my tyd te verbeter”, het hy bygevoeg.
Hy is van plan om 10 Kaapstad-fietstoere te voltooi voordat hy uittree, en sê dit gaan alles oor pret, liefdadigheid en om deel te wees van ’n wonderlike gesin, die Kaapstad-fietstoer-familie en vriende wat hy oor die jare gemaak het.. Chris Jooste van die TufoBMC-fietsryspan het die Kaapstad-fietstoer Sondag 12 Maart in perfekte fietsrytoestande in 02:36:14 gewen, terwyl Kim Le Court De Billot van Mauritius ’n driekuns in die vroueafdeling behaal het.
Andries Nigrini van span TEG was die naaswenner met Jaedon Terlouw van die Honeycomb-fietsryspan in die derde plek.
In die vroueren oor 78 km het Kim Le Court De Billot van Mauritius ’n driekuns behaal en die ren die derde agtereenvolgende jaar in twee uur 13 minute en 20 sekondes gewen.
Vera Looser van die Lapierre-Elysator-fietsryspan het tweede geëindig terwyl Ashleigh Moolman-Pasio van die AG Insurance Soudal QuickStep-fietsryspan in die derde plek klaargemaak het.
