Minister van internasionale betrekkinge en samewerking Ronald Lamola het aanvalle op buitelandse burgers veroordeel en gesê dit is onwettig en sal nie geduld word nie.

In sy toespraak by die Suider-Afrikaanse Ontwikkelingsgemeenskap (SAOG) se buitelandse ministers-beraad in Skukuza in die Krugerwildtuin, het Lamola gesê migrasie het as ‘n sleutelbesprekingspunt na vore gekom.

Verskeie streekgenote het kommer uitgespreek oor die veiligheid van hul burgers in Suid-Afrika ná onlangse betogings wat verband hou met onwettige migrasie en frustrasie rondom ongedokumenteerde buitelandse burgers.

“Ek is in gesprek met my eweknieë. Ek weet ook my eweknie van Ghana was hier. Tog het sommige van die SAOG se buitelandse ministers die kwessie met my geopper, veral Malawi, wie se burgers die meeste geraak is,” het Lamola gesê.

Hy het beklemtoon die regering bly ferm gekant teen enige aanvalle wat buitelandse burgers teiken.

“Ons het voortgegaan om hulle te verseker dat ons as ‘n Suid-Afrikaanse regering enige vorm van geweld teen buitelandse burgers  veroordeel. Dit is ingevolge ons wetgewing, slegs die polisie kan die wet afdwing,” het hy gesê.

Lamola het gesê hoewel Suid-Afrika voortgaan om uitdagings met betrekking tot onreëlmatige migrasie te ondervind, is slegs gemagtigde wetstoepasingsagentskappe gemagtig om immigrasiewette af te dwing.

“Ons het ‘n uitdaging met onwettige migrasie, onwettige gedokumenteerde of ongedokumenteerde buitelandse burgers in die land wat ons moet aanspreek, en ons moet as ‘n regering vermoë bou om daarop te reageer, om te weet wie in die land is, wat hulle doen, waar hulle is, en ook wanneer hulle ‘n misdaad gepleeg het. Hulle moet gearresteer word, of dit nou ‘n buitelandse burger of ‘n Suid-Afrikaner is,” het hy gesê.

Die minister het gesê migrasie sal deel vorm van breër besprekings by die beraad, veral aangesien SAOG dieper streeksintegrasie en ekonomiese samewerking nastreef.

“Een van die tematiese areas is migrasie, want streeksintegrasie sal nie gebeur as daar nie gemaklike beweging van mense en gemaklike beweging van goedere is nie,” het hy gesê.

Lamola het bygevoeg suksesvolle streeksintegrasie hang af van samewerking tussen lidstate, stabiele grense en respek vir die oppergesag van die reg.

Hy het ook die rol erken wat Afrika-lande gespeel het om Suid-Afrika se vryheidstryd te ondersteun, terwyl hy die behoefte beklemtoon het om wet en orde te handhaaf.

Die SAOG-beraad sal na verwagting fokus op strategiese prioriteite, insluitend infrastruktuurontwikkeling, industrialisasie, handel, energiesekuriteit, voedselsisteme, vervoer en logistiek, skuldbestuur, en die vrye beweging van mense, goedere en dienste regoor die streek.