Verskaf deur kykNET
Suid-Afrika se geskiedenis met kernwapens strek sover terug as 1944, toe die destydse Britse eerste minister, Winston Churchill, sy vriend en vertroueling, genl. Jan Smuts gekontak het om na uraan vir die Manhattan-projek te vra. Die Manhattan-projek het uiteindelik gelei na die eerste atoombomaanvalle op Hirosjima en Nagasaki in Japan.
Suid-Afrika sou eers jare later, self onder uiterste geheimhouding, regkry om atoombomme bou. Dit ondanks sanksies en ’n Verenigde Nasies-wapenverbod.
Waarna jy kan uitsien
Die Bom, ’n dokumentêre reeks van drie episodes, vertel die fassinerende verhaal van hierdie stuk geskiedenis wat nie so bekend is nie. Dis ’n verhaal van spioene, geheime, sluipmoorde, politieke intrige en terreur. Ontmoet die man wat groot gedeeltes van Koeberg in die 1980’s opgeblaas het. Kykers sal kennis maak met die hoof “bombouer”, wat Suid-Afrika se atoombomme gebou het. Dan is daar ook die persoon wat gesorg het dat die Verenigde Nasies sanksies teen Suid-Afrika ingestel het. En ’n Russiese spioen wat 20 jaar lank op Suid-Afrika en Navo-bondgenote gespioeneer het, terwyl die Koueoorlog op sy felste was.
Die Bom ondersoek nie net kernbomme nie, maar kyk ook na kernkrag, kernafval en wat die toekoms van kernenergie in Suid-Afrika inhou. Dit gee ’n blik op een van die oudste, werkende kernreaktors in die wêreld.
Die skeppers van die dokkie
Die regisseur van Die Bom is die bekroonde joernalis Pieter Steyn en dis vervaardig deur Minette van der Walt, van Van Woud Produksies.
Minette sê dit was ’n besondere voorreg om aan dié spesiale produksie te werk. “Suid-Afrika se kernbom-geskiedenis is ’n storie wat net weer eens bewys dat feite inderdaad vreemder as fiksie is! ’n Mens kan eintlik nie glo dat al hierdie dinge werklike gebeure is nie.”
Pieter Steyn sê dis ’n storie wat jou asem sal wegslaan. “Ondanks al die navorsing en inligting wat ons vooraf gedoen het, het daar tydens die produksieproses weer en weer nuwe en verrassende feite navore gekom. Dis ’n ongelooflike stuk geskiedenis en fassinerende storie.”
Die Bom begin Woensdag 23 September om 20:00 op kykNET, DStv-kanaal 144. Episodes sal ook beskikbaar wees op DStv Stream en Catch Up
Lees ook: ‘Tweespalt’: ’n Dokkie waar rugby-geesdriftiges koppe stamp | rooi rose
