WAAI (Wellington Association against the Incinerator), een van die organisasies waardeur inwoners van Wellington probeer om die oprigting van die vullisverbrandingsoond by hul dorp te keer, het die afgelope week sonder enige sukses probeer om die laaste datum waarop beswaar teen die oond gemaak kan word, uitgestel te kry.
Volgens Christine van Wyk, een van die bestuurslede van WAAI, het die bestuur van WAAI twee weke gelede vergader met Larry Eichstadt, ’n bestuurskonsultant gemoeid met die opstel van die finale verslag oor die impak wat so ’n oond op Wellington en omgewing sal hê.
“Ons het gevoel hierdie verslag raak soveel sake aan waaroor ons ernstig bekommerd is, dat ons tyd nodig het om behoorlik daarop te reageer. Om een voorbeeld te noem: tot dusver het die munisipaliteit en die maatskappy wat die verbrandingsoond wil oprig, heftig ontken dat die oond enige gesondheidsgevaar vir die mense in die omgewing inhou. Die verslag sê egter baie duidelik die oond gaan wel giftige gasse die lug in stuur en dit kan ’n nadelige uitwerking hê op mense wat binne 10 km van die oond af woon.”
Beswaarmakers moes hul besware voor of op 4 Desember aan die opstellers van die studie instuur. WAAI het gevra dat hierdie datum tot ten minste die einde Januarie 2018 uitgestel word.
Eichstadt het egter geweier om enige verdere uitstel te gee. Al wat die opstellers van die verslag bereid is om te doen, is om beswaarmakers te verseker hul besware wat ná 4 Desember ontvang word, bestudeer sal word.
Die finale besluit of die oond wel opgerig gaan word of nie, sal volgens Eichstadt voor die einde van Februarie 2018 bekendgemaak word.
