Dit is elke jaar ‘n hoogtepunt op menige boer en buitelugliefhebber se kalender – NAMPO Kaap wat van 9 tot 12 September in Bredasdorp gaan plaasvind.

Die grootste ekspo van sy soort in die Wes-Kaap bring produsente, landbouorganisasies, navorsers, diensverskaffers en gemeenskappe van oor die landbouwaardeketting van Suid-Afrika bymekaar.

Die jaar se tema, “Saam groei ons”, vier die vennootskappe tussen produsente, die bedryf en gemeenskappe wat Suid-Afrikaanse landbou vorentoe dryf.

Uitstalruimtes

Met 600 uitstalruimtes en parkering oor 32 hektaar sal besoekers toegang hê tot meer as 500 uitstallers wat die nuutste landboutegnologie, produkte, dienste en innovasies ten toon stel.

“Die 2026-tema weerspieël ’n eenvoudige, maar belangrike werklikheid: Landbou kan nie in isolasie floreer nie. Die bou van ’n veerkragtige, mededingende en volhoubare sektor hang af van sterk vennootskappe tussen produsente, landboubesighede, georganiseerde landbou, navorsers, innoveerders, diensverskaffers, finansiers, die regering en die gemeenskappe wat die sektor ondersteun.

“Dit is veral relevant vir produsente in die wintergraangebiede, waar druk op produktiwiteit, winsgewendheid en langtermynvertroue steeds toeneem. Hoë insetkoste, swakker kommoditeitspryse, finansieringskoste, beleidsonsekerheid en moeilike produksietoestande plaas baie produsente onder finansiële druk. Onlangse verwikkelinge rondom die koringtariefbedeling het kommer oor produsentevertroue, mededingendheid en die langtermynvolhoubaarheid van plaaslike koringproduksie verder verskerp,” het dr. Dirk Strydom, besturende direkteur van NAMPO (Edms) Bpk, gesê.

Volgens hom het NAMPO Kaap ’n belangrike platform geword omdat dit ruimte skep waar produsente in moeilike tye rigting kan vind.

Vind meer uit

“Produsente in die wintergraangebiede boer in ’n omgewing waar elke besluit al hoe meer kompleks raak. Produktiwiteit, winsgewendheid, insetkoste, marktoegang en beleidsekerheid vorm almal deel van dieselfde gesprek. NAMPO Kaap bied aan produsente die geleentheid om uit isolasie te tree, met die breër waardeketting te skakel en praktiese antwoorde te soek wat hul ondernemings en vertroue vir die seisoene wat voorlê, kan versterk,” sê Strydom.

Hoewel individuele produsente hierdie uitdagings dikwels alleen dra, bied NAMPO Kaap ’n ruimte waar hulle kan kontak maak, idees kan vergelyk, nuwe tegnologieë kan verken en deel kan neem aan praktiese gesprekke wat tot werklike oplossings op plase kan lei. Die ekspo is nie net ’n vertoonvenster vir produkte en dienste nie, maar ook ’n ontmoetingsplek vir nuwe denke, samewerking en gesamentlike probleemoplossing.

Henk Aggenbach, voorsitter van Bredasdorp Park NPC, sê die tema is besonder relevant binne die huidige omgewing waarin landbouprodusente in Suid-Afrika hulself bevind. “Oor die sektor heen werk baie ondernemings harder vir kleiner marges. Produksiekoste bly hoog, terwyl swakker kommoditeitspryse steeds druk op produsente plaas,” sê hy.

Lewendehaweprodusente hanteer ook steeds die impak van bek-en-klouseer, wat finansiële druk verhoog, veebeweging ontwrig en toegang tot uitvoermarkte beïnvloed het. Daarbenewens het erge oorstromings in Mei vanjaar wydverspreide infrastruktuurskade oor die Wes-Kaap heen veroorsaak. Hierdie werklikhede beklemtoon hoe blootgestel produsente nie net aan markdruk is nie, maar ook aan dieregesondheidsrisiko’s, infrastruktuurswakhede en uiterste weersomstandighede.

Teen hierdie agtergrond is “Saam groei ons” meer as net ’n tema; dit is ’n praktiese verklaring van hoe die landbousektor vorentoe beweeg.