Badisa is ‘n organisasie sonder winsoogmerk en spits hom toe op volhoubare maatskaplike dienste en residensiële sorg aan kwesbare mense. Die groep fokus op gemeenskapsontwikkeling, kindersorg, ouer mense en rehabilitasie in samewerking met die NG kerk en die VGK.
Aangesien kindersorg hulle baie na aan die hart lê, het Badisa Tygerberg in 2022 die “Kuumba Care-program” gestig, met Kuumba as hul gelukbringer. Kuumba is ‘n fiktiewe karakter van Reënboogland wat aarde toe gekom het om met kinders maats te maak. Nadat hy heerlik gespeel het, kon hy nie weer sy pad terugvind na Reënboogland nie en het vir ‘n paar weke op straat gewoon. ‘n Vrou van Badisa Tygerberg het hom honger, dors en bedremmeld opgespoor en liefderyk versorg. Daar en dan het Kuumba besluit om op aarde te bly om hom daaraan toe te wy om kwesbare kinders te help.
Badisa het die afgelope Saterdag (7 Maart) ‘n kleur-pretdraf in samewerking met die Caledon Parkrun aangebied. Rayvon Joemath van Badisa sê: “Kuumba-dag is eintlik op 6 Maart, maar omdat Kuumba mos ‘n kleurryke karakter van Reënboogland is, het ons besluit om ‘n kleur-pretloop te hou.”
“Kuumba se boodskap is dat hy kinders wil beskerm en omdat ons voorkomingsdienste lewer, gebruik ons Kuumba om ons dienste te bemark,” sê Joemath.
Kuumba was die laaste ruk baie bedrywig en het Tesselaarsdal Primêr, Sonskyn-kleuterskool, Swartberg Primêr en Tafelronde Herberg besoek. Groot opgewondenheid het oral waar Kuumba was, geheers. Die kinders het aandagtig na sy storie geluister en kon nie wag om hom agterna ‘n drukkie te gee nie.
Badisa se kleur-pretloop is tydens die Caledon Parkrun se 139ste Parkrun gehou, wat deur die 12-jarige Adriaan de Beer gewen is. Adriaan het heel gepas kort ná die wegspring onder oranje poeierverf deurgeloop.
