Ná 44 jaar se toewyding het Christina Coetzee, Macassar se geliefde onderwyspilaar, die afgelope Donderdag (11 Desember) haar kryt vir die laaste keer neergesit.
Die Hoërskool Zandvliet het die 66-jarige, wat vier generasies van die gemeenskap se kinders opgevoed het, met ‘n verrassing-afskeidsmiddagete bedank.
Sy is onkant betrap en oorweldig deur die liefde van haar kollegas toe hulle haar in aftrede begelei het.
“Ouderdom speel ‘n rol in besluitneming en ek dink nou is die regte tyd om vaarwel te sê,” sê Coetzee.
Haar pad na onderwys het op ‘n plaas in Oak Valley begin, waar die Grabouw-boorling grootgeword het. Ná matriek aan die Hoërskool Gordon het sy die Hewat-onderwysersopleidingskollege bygewoon.
“Destyds was daar slegs twee beroepe – onderwys óf verpleging – en ek het onderwys gekies,” onthou Coetzee.
Sy het haar studies in 1980 voltooi en ‘n jaar later by die Macassar Sekondêre Skool ingeval – ‘n loopbaan wat sy heeltemal in die Macassar-gemeenskap sou deurbring.
“Dit was jare gelede, en soos enige nuwe werksomgewing, was dit oorweldigend – veral om voor soveel leerders te staan.”
Daarna het sy by Oklahoma Primêre Skool klasgegee voordat sy in 2005 by die Hoërskool Zandvliet aangesluit het.
Hoewel sy aanvanklik deur die leerders geïntimideer is, het onderrig gou tweede natuur geword.
“As jy ‘n onderwyser is, wil jy dit ten volle uitleef,” sê Coetzee.
Sy verduidelik dat sy met die jare moes aanpas. “Generasies verander en elke geslag is anders.”
Sy gee krediet aan haar kollegas deur die jare – veral dié by Zandvliet – vir hul ondersteuning om langer as vier dekades onderrig te gee.
Haar planne vir die toekoms is nie buitensporig nie – sy wil meer tyd saam met haar familie deurbring. ” ‘n Mens moet ook tyd neem om na jou gesin om te sien.”
‘n Deel van haar sal egter altyd in die klaskamer bly. Dit sal voortleef deur die kollegas wat sy aangeraak het en die leerders wat sy geïnspireer het.
Hoewel sy nou haar klaskamer verlaat, sal Coetzee se stem nog lank in Zandvliet se gange weerklink. Soos sy self sê: “Kinders se gedrag – maak nie saak hoe jy daarna kyk nie; ek gaan die kinders mis.”
You must be logged in to post a comment.