‘n Nuwe kreatiewe brandpunt bied van vandeesweek af toegang tot musiek, dans, kuns en ‘n veilige ruimte aan kinders en jongmense van Langrug om groter te droom.
Die Tomorrowland-stigting het sy vierde musiek- en kunsteskool gister (Woensdag 29 April) geopen. Dit was die eerste in die Langrug-gemeenskap, net buite Franschhoek. Die nuwe skool is die produk van ‘n unieke samewerking tussen die Tomorrowland-stigting en die Langrug-gemeenskapsentrum (LGS). Dit sal ‘n ruimte skep waar kinders en jongmense kan leer, skep, optree en hulself kan uitdruk.
Vorige kunsteskole sluit lande soos Nepal, Indië en Brasilië in. Die skool in Franschhoek is ‘n eerste vir die stigting in Afrika. Die projek versterk die stigting se vennootskap tot die bemagtiging van kwesbare kinders en jongmense deur musiek, dans, kuns en kreatiewe onderwys.
Veerkragtige gemeenskap met potensiaal
Die Langrug-gemeenskapsentrum is in die hart van Langrug geleë. Die buurt word deur daaglikse uitdagings soos armoede, werkloosheid en beperkte toegang tot noodsaaklike dienste gekenmerk.
Tog is dit ook ‘n gemeenskap wat bruis van innerlike krag, kreatiwiteit, ambisie en onontginde potensiaal.
Die LGS het in 2012 as ‘n sopkombuis begin en intussen as ‘n gemeenskapsgedrewe vesting van hoop en geleenthede ontluik. Vandag bied die LGS deurslaggewende ondersteuning deur voedingskemas, onderwys en vaardigheidsontwikkeling, wat individue en gesinne bemagtig om selfversorgende en betekenisvolle lewens te lei. Hoewel die sentrum vir alle lede van die gemeenskap oop is, plaas dit spesifieke klem op die bemagtiging van kinders en jongmense om te verseker dat die volgende geslag die gereedskap en geleenthede het wat nodig is om ‘n beter toekoms te vorm.
Bemagtiging deur musiek en kuns
Die plaaslike gemeenskapsentrum neem met die ondersteuning van die Tomorrowland-stigting ‘n stap vorentoe. Die nuwe musiek- en kunsteskool is ‘n volledig toegewyde ruimte vir kreatiewe uitdrukking, onderwys en persoonlike groei. Die moderne fasiliteit beslaan twee verdiepings en is aangevul deur ‘n amfiteater. Die skool is met modulêre eenhede gebou en bestaan uit toegeruste klaskamerruimtes wat spesifiek ontwerp is vir musiek, dans, visuele kunste, lees en ander vorms van kreatiewe uitdrukking. Smiddae word ‘n naskoolse program vir ses- tot 16-jariges aanbied.
Die plan is om die program geleidelik uit te brei na ‘n daaglikse kapasiteit van tot 600 kinders en jongmense. Die lesse sal ondersteun word deur ‘n span onderwysers, kunstenaars en fasiliteerders, met die voorneme om mense van die Langrug-gemeenskap self te betrek en op te lei.
Sodoende sal die skool nie net geleenthede vir kinders skep nie, maar ook tot gemeenskapseienaarskap bydra.
‘n Langtermynvisie vir groei
Die opening van die musiek- en kunste-skool help die sentrum om meer kinders te bereik en ‘n deurlopende ontwikkelingspad vir kinders te skep namate hulle ouer word. Hierdie uitbreiding weerspieël ‘n langtermynvisie – om kinders nie net in hul vroeë jare te ondersteun nie, maar reg deur hul vormingsjare tot selfversekerde, kreatiewe en veerkragtige individue. Die skool sal deur musiek en die kunste ‘n plek aan kinders en jongmense bied waar hulle gesien, gehoor en aangemoedig word om buite die grense van hul daaglikse omstandighede te droom.
Gedryf deur ‘n toegewyde span
‘n Projek van hierdie omvang kan slegs verwesenlik word deur die passie en toewyding van die mense daaragter.
Die sentrum word gelei deur ‘n plaaslike span wat elke dag werk om op die behoeftes van die gemeenskap te reageer en praktiese ondersteuning in langtermyngeleenthede om te skep.
Janet Johnson, die stigter en koördineerder, lei die sentrum se inisiatiewe, geldinsamelingspogings en vennootskappe. Sy word gedryf deur ‘n verbintenis tot Langrug en vervul ‘n sentrale rol om
die sentrum met die gemeenskap te verbind. Nasiphi Notoza sien om na die township-toere, behartig die administrasie en help verseker dat die sentrum se daaglikse bedrywighede vlot verloop. Bhura Balangile koördineer die voedingskema, terwyl Kathleen Aerts en Steven van Hoof die internasionale ambassadeurs is.
Aerts, ‘n Belgiese sangeres, aanbieder en voormalige lid van K3, woon al vir etlike jare saam met Van Hoof en hul gesin in Suid-Afrika.
